ಓಂಕಾರ ದಶಮಾನೋತ್ಸವ

ಓಂಕಾರ ದಶಮಾನೋತ್ಸವ -2021

ಓಂಕಾರ ಗಣವಂದ್ಯಾಯ ಜ್ಞಾನಾನಂದೈಕ ಮೂರ್ತಯೇ |

ಸುಗುಣೇಂದ್ರನುತಾಯ ಶ್ರೀ ಕಪೀಂದ್ರಾಯ ನಮೋ ನಮಃ ||

ಕೆಲವು ಕ್ರಿಯಾಶೀಲ ಉತ್ಸಾಹಭರಿತ ಸಮಾನ ಚಿಂತಕರು ಸೇರಿ ಓಮಾನ್ ನಲ್ಲಿರುವ ಕನ್ನಡಿಗರಿಗಾಗಿ ಉತ್ತಮ ಧಾರ್ಮಿಕ ಸಾಂಸ್ಕ್ರತಿಕ ಹಾಗೂ ಆಧ್ಯಾತ್ಮಿಕ ಕಾರ್ಯಗಳನ್ನು ನೀಡಬೇಕೆಂಬ ಉತ್ತಮ ಉದ್ದೇಶದಿಂದ 2012 ರಲ್ಲಿ ಆರಂಭವಾದದ್ದು ಓಂಕಾರ ಸಮಿತಿ. ಅದಕ್ಕನುಗುಣವಾಗಿ ಆಗಿನಿಂದ ಇಲ್ಲಿಯವರೆಗೂ ಪ್ರತಿ ವರ್ಷ ಸಮಿತಿಯ ಆರಾಧ್ಯ ದೈವ ಶ್ರೀ ಓಂಕಾರ ಆಂಜನೇಯನ ಭಕ್ತಿ ಪೂರ್ಣ  ಪೂಜೆ, ಜ್ಞಾನ ಪೂರ್ಣ ಓಂಕಾರ ಜ್ಞಾನಾಮೃತ, ನಾದಮಯ ಓಂಕಾರ ನಾದಾಮೃತ ಕಾರ್ಯಕ್ರಮಗಳನ್ನು ಯಶಸ್ವಿಯಾಗಿ ನಡೆಸುತ್ತಾ ಬಂದು ಎಲ್ಲರ ಅಭಿಮಾನಕ್ಕೆ ಪಾತ್ರವಾಗಿದೆ.

ಕರೋನಾ ಹೆಮ್ಮಾರಿಯ ಧಾಳಿಗೆ ಸಿಲುಕಿ ವಿಶ್ವವೇ ನಲುಗಿದ ಈ ಎರಡು ವರ್ಷಗಳಲ್ಲಿ ಕೂಡ ಕಲಾಭಿಮಾನಿಗಳಿಗೆ ನಿರಾಸೆಯಾಗದಂತೆ ಆದರೆ ಕರೋನಾ ನಿರ್ಬಂಧಗಳನ್ನೂ ಮೀರದಂತೆ ಸಾಮಾಜಿಕ ತಾಣಗಳ ಮೂಲಕ ಯಶಸ್ವಿಯಾಗಿ ಕಾರ್ಯಕ್ರಮಗಳನ್ನು ಆಯೋಜಿಸಿದ ಹಿರಿಮೆ ಓಂಕಾರ ಸಮಿತಿಯದು.

ಈ ಬಾರಿ ಓಂಕಾರ ಸಮಿತಿಗೆ ದಶಮಾನೋತ್ಸವದ ವಿಶೇಷ ಸಂಭ್ರಮ. ಈ ಬಾರಿ ದಶಮಾನೋತ್ಸವಕ್ಕಾಗಿ ವಿಶೇಷ ಕಾರ್ಯಕ್ರಮಗಳನ್ನು ಮಾಡಬೇಕೆಂದು ನಿರ್ಧರಿಸಿ, ಓಂಕಾರ ಸಮಿತಿಯು ಶ್ರೀ ಓಂಕಾರ ಆಂಜನೇಯನ ಪೂಜೆ, ದಶಕ ನಡೆದು ಬಂದ ದಾರಿಯ ಓಂಕಾರ ಸಿಂಹಾವಲೋಕನ, ಓಂಕಾರ ಜ್ಞಾನಾಮೃತದ ಅಂಗವಾಗಿ ಹರಿಕಥೆ ಕಾರ್ಯಕ್ರಮ ಮತ್ತು ಓಂಕಾರ ನಾದಾಮೃತಕ್ಕಾಗಿ ಭಕ್ತಿ ಸಂಗೀತ ಮತ್ತು ಓಂಕಾರ ಸಂವಾದ ಕಾರ್ಯಕ್ರಮಗಳನ್ನು ಆಯೋಜಿಸಿ, ಡಿಸೆಂಬರ್ ೧೭ ಮತ್ತು ೧೮ರಂದು ಎರಡು ದಿನಗಳ ಕಾಲ ಸಾಮಾಜಿಕ ತಾಣಗಳಾದ ಓಂಕಾರ ಸಮಿತಿಯ ಫೇಸ್‌ಬುಕ್‌ ಮತ್ತು ಯೂಟ್ಯೂಬ್ ನಲ್ಲಿ ಲೈವ್ ಮೂಲಕ ಪ್ರಸಾರ ಮಾಡಲಾಯಿತು. 

ಕರೋನಾ ನಿರ್ಬಂಧಗಳು ಇನ್ನೂ ಇರುವುದರಿಂದ ಅವುಗಳಿಗನುಗುಣವಾಗಿ ಈ ಬಾರಿಯೂ ಸಾಮಾಜಿಕ ತಾಣಗಳ ಮೂಲಕವೇ ಕಾರ್ಯಕ್ರಮಗಳನ್ನು ನಡೆಸಲು ಮುಂಚೆಯೇ ನಿರ್ಧರಿಸಲಾಗಿತ್ತು ಮತ್ತು ಈ ಎಲ್ಲ ಕಾರ್ಯಕ್ರಮಗಳ ಪೂರ್ವಭಾವಿ ತಯಾರಿಗಳನ್ನು ಬಹಳ ವ್ಯವಸ್ಥಿತವಾಗಿ ಮಾಡಲಾಯಿತು.

ಮೊದಲನೆಯ ದಿನ 

ಶುಕ್ರವಾರ ಡಿಸೆಂಬರ್ ೧೭ರಂದು ಓಂಕಾರ ಆಂಜನೇಯ ಪೂಜೆ, ಓಂಕಾರ ಸಿಂಹಾವಲೋಕನ ಮತ್ತು ಹರಿಕಥೆ ಕಾರ್ಯಕ್ರಮಗಳನ್ನು ಓಂಕಾರ ಸಮಿತಿಯ ಚಾನೆಲ್ ಲೈವ್ ಗಳಲ್ಲಿ ಬಿತ್ತರಿಸಲಾಯಿತು. 

Click here for Day-1 Complete Video

ಅದರಂತೆ ಮೊದಲು ಒಂದು ಶುಭದಿನ ಅತ್ಯಂತ ಸರಳವಾಗಿ ಯಾವುದೇ ವಿಜೃಂಭಣೆ ಇಲ್ಲದೇ ಸರಳವಾಗಿ ಆದರೆ ಅತ್ಯಂತ ಭಕ್ತಿ ಶ್ರದ್ಧೆಗಳಿಂದ ಆಚರಣೆಗಳಿಗೆ ಚ್ಯುತಿ ಇಲ್ಲದಂತೆ ಪ್ರತಿಬಾರಿಯಂತೆ ಸಂಪ್ರದಾಯ ಬದ್ಧವಾಗಿ ಶ್ರೀ ಓಂಕಾರ ಆಂಜನೇಯನ ವಾರ್ಷಿಕ ಪೂಜೆ ನಡೆಸಿತು.

ದಶಮಾನೋತ್ಸವದ ಸಂದರ್ಭದಲ್ಲಿ ಶ್ರೀ ಓಂಕಾರ ಆಂಜನೇಯ ಸ್ವಾಮಿಗಾಗಿ ಶತಾವಧಾನಿ ಶ್ರೀಯುತ ಡಾ ಆರ್ ಗಣೇಶ್ ಅವರಿಂದ ರಚಿಸಲ್ಪಟ್ಟ ಈ ಕೆಳಗಿನ ಶ್ಲೋಕವನ್ನು ಆಂಜನೇಯ ಸ್ವಾಮಿಗೆ ಸಮರ್ಪಿಸಲಾಯಿತು.

 || ಓಂಕಾರ ಗಣವಂದ್ಯಾಯ ಜ್ಞಾನಾನಂದೈಕ ಮೂರ್ತಯೇ |
ಸುಗುಣೇಂದ್ರನುತಾಯ ಶ್ರೀ ಕಪಿಂದ್ರಾದ್ರಾಯ ನಮೋ ನಮಃ ||  

ಓಂಕಾರ ಸಿಂಹಾವಲೋಕನ

ಓಂಕಾರ ಸಮಿತಿಯು ದಶಮಾನೋತ್ಸವದ ಪ್ರಯುಕ್ತ ದಶಮಾನ ಕಾಲ ಓಂಕಾರ ಸಮಿತಿಯು ನಡೆದು ಬಂದ ದಾರಿಯ ಮಾಹಿತಿ ನೀಡುವ  ಪ್ರಯುಕ್ತವಾಗಿ ಓಂಕಾರ ಸಿಂಹಾವಲೋಕನ ಎಂಬ ಕಿರುಚಿತ್ರವನ್ನು ನಿರ್ಮಿಸಿದ್ದರು. ಈ ಕಿರುಚಿತ್ರವನ್ನು ಬೆಂಗಳೂರಿನ ಶ್ರೀ ಸೌರಭ ಕುಲಕರ್ಣಿ ಮತ್ತು ಕುಮಾರಿ ನಮಿತಾ ರವರು ನಿರೂಪಿಸಿ ತಯಾರಿಸಿದ್ದರು. ಓಂಕಾರ ಸಿಂಹಾವಲೋಕನ ಕಿರುಚಿತ್ರ ಓಂಕಾರ ಸಮಿತಿ ಇಲ್ಲಿಯವರೆಗೆ ನಡೆಸಿಕೊಂಡು ಬಂದ ಕಾರ್ಯಕ್ರಮಗಳು ಮತ್ತು ಅವುಗಳ ನಿರ್ವಹಣೆಯ ಮಾಹಿತಿಯನ್ನು ಎಳೆ - ಎಳೆಯಾಗಿ ಬಿಚ್ಚಿಟ್ಟರು. 

Click here Omkar Simahavalokana

ಸುಂದರ ನಿರೂಪಣೆಯೊಂದಿಗೆ ಓಂಕಾರ ಸಮಿತಿಯ ಕಾರ್ಯಕ್ರಮದಲ್ಲಿ ಅತಿಥಿಗಳಾಗಿ ಭಾಗವಹಿಸಿದ ಎಲ್ಲ ಮಹನೀಯರ ಓಂಕಾರ ಸಮಿತಿಯ ಬಗ್ಗೆ ಮಾತನಾಡಿದ ಮನದಾಳದ ಮಾತುಗಳು ಮತ್ತು ಶುಭಾಶಯಗಳು ವಿಶಿಷ್ಟವಾಗಿತ್ತು.

Click here for Omkar Guests Wishes 

ಹರಿಕಥೆ - ಸುಂದರಕಾಂಡ ಆಧಾರಿತ ಹನುಮದ್-ಭಕ್ತಿ 

ಈ ಬಾರಿಯ ಜ್ಞಾನಾಮೃತ ಕಾರ್ಯಕ್ರಮದ ಅಂಗವಾಗಿ ಹರಿಕಥೆ ಕಾರ್ಯಕ್ರಮವನ್ನು ನಡೆಸಿಕೊಟ್ಟವರು ಮಂಗಳೂರಿನ ಹರಿಕಥಾ ವಿದ್ವಾನ್ ಶ್ರೀ ಡಾ. ಎಸ್ ಪಿ ಗುರುದಾಸ್ ರವರು. ನಶಿಸಿ ಹೋಗುತ್ತಿರುವ ಅದ್ಭುತ ಕಲಾಪ್ರಾಕಾರ ಹರಿಕಥಾ ಕಾಲಕ್ಷೇಪ. ಈ ಕಲೆಗೆ ಉತ್ತೇಜನ ನೀಡುವ ಉದ್ದೇಶದಿಂದಲೇ ಈ ಬಾರಿ ಹರಿಕಥೆಯನ್ನು ಹಮ್ಮಿಕೊಳ್ಳಲಾಗಿತ್ತು. ಶ್ರೀಯುತ ಡಾ ಎಸ್ ಪಿ ಗುರುದಾಸ ಅವರು ಸುಂದರಕಾಂಡ ಆಧಾರಿತ ಹನುಮದ್-ಭಕ್ತಿ ಎಂಬ ಹರಿಕಥೆಯನ್ನು ಸಾಂಪ್ರದಾಯಿಕ ಪದ್ಧತಿಯಲ್ಲಿ ಎಲ್ಲರ ಮನಮುಟ್ಟುವಂತೆ ನಿರೂಪಿಸಿ ಮಸ್ಕತ್ ಕನ್ನಡಿಗರನ್ನೆಲ್ಲ ಆಂಜನೇಯನ ಭಕ್ತಿಯ ಪರಾಕಾಷ್ಠೆಯಲ್ಲಿ ಮುಳುಗಿಸಿದರೆಂದರೆ ತಪ್ಪಾಗಲಾರದು. ಶ್ರೀ ಗುರುದಾಸ್ ಅವರಿಗೆ ಹಿಮ್ಮೇಳ ಸಹಕಾರವನ್ನು  ಶ್ರೀ ರಮೇಶ್ ಹೆಬ್ಬಾರ್, ಶ್ರೀ ಸುಮನ್ ದೇವಾಡಿಗ, ಶ್ರೀ ಆತ್ರೇಯ ಗಂಗಾಧರ್ ಮತ್ತು ಶ್ರೀ ಸತೀಶ್ ಕಾಮತ್ ರವರು ಅಷ್ಟೇ ಅದ್ಭುತವಾಗಿ ನೀಡಿದರು.

Click Here for Harikathe by 

Sri Dr Gurudas Shivapura

ಶ್ರೀಮತಿ ಕವಿತಾ ರಾಮಕೃಷ್ಣ ಮತ್ತು ಶ್ರೀಮತಿ ವೀಣಾ ಶ್ರೀನಿವಾಸ ಅವರು ದಶಮಾನೋತ್ಸವದ ವಿವರಣೆ, ಕಲಾವಿದರ ಪರಿಚಯ ಹಾಗೂ ಸುಂದರವಾದ ನಿರೂಪಣೆಯೊಂದಿಗೆ ಮೊದಲನೆಯ ದಿನದ ಕಾರ್ಯಕ್ರಮವನ್ನು ಅಚ್ಚುಕಟ್ಟಾಗಿ ನಡೆಸಿಕೊಟ್ಟರು.

ಎರಡನೆಯ ದಿನ 

ಶನಿವಾರ ಡಿಸೆಂಬರ್ ೧೮ರಂದು ಓಂಕಾರ ಜ್ಞಾನಾಮೃತ ಹಾಗೂ ಓಂಕಾರ ಸಂವಾದ ಕಾರ್ಯಕ್ರಮಗಳನ್ನು ಓಂಕಾರ ಸಮಿತಿಯ ಚಾನೆಲ್ ಲೈವ್ ಗಳಲ್ಲಿ ಬಿತ್ತರಿಸಲಾಯಿತು. 

Click here for Day-2 Complete Video

ಓಂಕಾರ ನಾದಾಮೃತ

ಈ ವರ್ಷದ ಓಂಕಾರ ನಾದಾಮೃತ ಕಾರ್ಯಕ್ರಮದ ಈ ಬಾರಿಯ ಅತಿಥಿಗಳು ಮೈಸೂರಿನ ಜನಪ್ರಿಯ ಗಾಯಕ ಶ್ರೀ ಶ್ರೀಹರ್ಷರವರು ನಡೆಸಿಕೊಟ್ಟರು‌. ಶ್ರೀಹರ್ಷ ಅವರು ರಂಗಗೀತೆ, ದಾಸರ ಪದಗಳು, ಶರೀಫರ ತತ್ವಪದ, ತೆಲುಗು ಭಕ್ತಿಗೀತೆಗಳನ್ನೊಳಗೊಂಡ ಅಮೋಘ ಗಾಯನ ಮತ್ತು ವಿಭಿನ್ನವಾದ ಹಾಡುಗಳ ನಿರೂಪಣೆ ಸಂಗೀತದ ರಸಿಕರಿಗೆ ರಸದೌತಣ ನೀಡಿ ಸಂಗೀತ ಸುಧೆಯಲ್ಲಿ ಎಲ್ಲರನ್ನೂ ಮೀಯಿಸಿತು.  ಶ್ರೀಹರ್ಷ ಅವರ ಸಂಗೀತ ಎಲ್ಲಾ ಪ್ರೇಕ್ಷಕರನ್ನು ಮಂತ್ರಮುಗ್ದರನ್ನಾಗಿಸಿ ಮಸ್ಕತ್ ನ ಸಭಾಂಗಣದಲ್ಲಿಯೇ ಕಾರ್ಯಕ್ರಮ ನಡೆಸಿಕೊಡುವಂತೆ ಕೇಳಿಕೊಳ್ಳುವ ಸಂದೇಶಗಳು ಹರಿಯುತ್ತಿದ್ದವು. 

Click here for Omkar Naadamrutha by 
Sri Shriharsha 

ಓಂಕಾರ ಸಂವಾದ

ಓಂಕಾರ ಜ್ಞಾನಾಮೃತ ಕಾರ್ಯಕ್ರಮದ ನಂತರ ಓಂಕಾರ ಸಮಿತಿಯ ನೇರವಾಗಿ ನಡೆದ ಓಂಕಾರ ಸಂವಾದ ಕಾರ್ಯಕ್ರಮದಲ್ಲಿ ವಿಶ್ವದ ಬೇರೆ ಬೇರೆ ಸ್ಥಳಗಳಿಂದ ಓಂಕಾರ ಸಮಿತಿಯ ರೂವಾರಿಗಳು , ಸದಸ್ಯರು , ಕಾರ್ಯಕರ್ತರು ಸಮಿತಿಯೊಂದಿಗಿನ ತಮ್ಮ ತಮ್ಮ  ಒಡನಾಟಗಳನ್ನು ಅನುಭವವನ್ನು ಎರಡು ಘಂಟೆಗಳ ಕಾಲ ಹಂಚಿಕೊಂಡು ತಮ್ಮ ಹರ್ಷ ವ್ಯಕ್ತಪಡಿಸಿದರು. 

Click here for Omkar Samvaada 

ಶ್ರೀಮತಿ ಗಿರಿಜಾ ರವಿಕುಮಾರ ಮತ್ತು ಶ್ರೀಮತಿ ಶ್ರೀಮಾತಾ ಹಿರಿಯಣ್ಣ ಅವರು ಜ್ಞಾನಾಮೃತದ ವಿವರಣೆ, ಕಲಾವಿದರ ಪರಿಚಯ ಹಾಗೂ  ಸುಂದರವಾದ ನಿರೂಪಣೆಯೊಂದಿಗೆ ಎರಡನೇಯ ದಿನದ ಕಾರ್ಯಕ್ರಮವನ್ನು ಅಚ್ಚುಕಟ್ಟಾಗಿ  ನಡೆಸಿಕೊಟ್ಟರು. 

ಒಟ್ಟಿನಲ್ಲಿ ಓಂಕಾರ ಸಮಿತಿಯ ದಶಮಾನೋತ್ಸವ  ವರ್ಷದ ವಿಶೇಷ ಕಾರ್ಯಕ್ರಮಗಳು ನಿರ್ಬಂಧಗಳ ನಡುವೆಯೂ  ಅವಿಸ್ಮರಣೀಯವಾಗಿ   ಅತ್ಯಂತ ಸಂಭ್ರಮದಿಂದ ಎರಡು ದಿನಗಳ ಕಾಲ ಯಶಸ್ವಿಯಾಗಿ ನೆರವೇರಿತು.

ವರದಿ : ಶ್ರೀಮತಿ ವೀಣಾ ಶ್ರೀನಿವಾಸ 

ಪುರಂದರ ನಮನ - ೨೦೧೬

ಪುರಂದರ ನಮನ - ೨೦೧೬

'ದಾಸರೆಂದರೆ ಪುರಂದರದಾಸರಯ್ಯಾ'-ಎಂದು ತಮ್ಮ ಗುರುಗಳಾದ ಶ್ರೀ ವ್ಯಾಸರಾಯರಿಂದಲೇ ಹಾಡಿಸಿಕೊಂಡು, ದಾಸಶ್ರೇಷ್ಠರೆನಿಸಿದ ಪುರಂದರದಾಸರನ್ನು ನೆನೆಯುತ್ತಾ, ಅವರ ಕೀರ್ತನೆಗಳನ್ನು ಹಾಡುತ್ತಾ, ಓಂಕಾರ ಸಮಿತಿಯಿಂದ 12/02/2016 ಆಯೋಜಿಸಲ್ಪಟ್ಟ' ಪುರಂದರ ನಮನ ' ಕಾರ್ಯಕ್ರಮವು ಪುರಂದರದಾಸರ ಚಿಂತನೆಗಳನ್ನು ಸ್ವದೇಶದಿಂದ ದೂರವಿರುವ ಮಸ್ಕತ್ ನಲ್ಲಿಯೂ ಮೊಳಗಿಸಿತು.

ದಿನಾಂಕ 12/02/2016ರ ಸಂಜೆ 6.00 ರಿಂದ 9.30ಯ ತನಕ ಮಸ್ಕತ್ತಿನ ಶ್ರೀಕೃಷ್ಣ ದೇವಸ್ಥಾನದ ಸಭಾಂಗಣದಲ್ಲಿ ನಡೆದ ಈ ಕಾರ್ಯಕ್ರಮದ ತಯಾರಿ ಸುಮಾರು ಒಂದು ತಿಂಗಳ ಹಿಂದೆಯೇ ಆರಂಭವಾಗಿತ್ತು. ಓಂಕಾರ ಸಮಿತಿಯು ಕಾರ್ಯಕ್ರಮದ ಕೆಲಸಗಳನ್ನು ಹಲವು ಜನರಲ್ಲಿ ವಿಂಗಡಿಸಿ - ಕಾರ್ಯಕ್ರಮದ ತಯಾರಿ ಸರಿಯಾದ ರೀತಿಯಲ್ಲಿ ನಡೆಯುತ್ತಿದೆ ಎಂದು ಮೇಲ್ವಿಚಾರಣೆ ನಡೆಸುತ್ತಿದ್ದರು. ಪುರಂದರ ಕೃತಿಗಳ ಗಾಯನ ಕಾರ್ಯಕ್ರಮವನ್ನು ಐದು ತಂಡಗಳಲ್ಲಿ ವಿಂಗಡಿಸಿ, ಎಲ್ಲ ತಂಡಗಳಿಂದಲೂ ಅವರು ಹಾಡುವ ಕೀರ್ತನೆಗಳನ್ನು ತರಿಸಿ, ಯಾವ ಕೀರ್ತನೆಯೂ ಪುನರಾವರ್ತನೆಯಾಗುತ್ತಿಲ್ಲ ಎಂಬುದನ್ನು ಖಚಿತಪಡಿಸಿಕೊಂಡಿದ್ದರು. ಕಾರ್ಯಕ್ರಮದ ದಿನ ಕಾರ್ಯಕರ್ತರೆಲ್ಲ ಸೇರಿ ವೇದಿಕೆಯನ್ನು ಭವ್ಯವಾಗಿ ಸಜ್ಜುಗೊಳಿಸಿದರು.

ನಿಗದಿತ ಸಮಯಕ್ಕೆ ಶ್ರೀ ಲಕ್ಷ್ಮೀನಾರಾಯಣ ಆಚಾರ್ಯ ಅವರ ಪೂಜೆಯಿಂದ ಕಾರ್ಯಕ್ರಮ ಆರಂಭವಾಯಿತು. ನಂತರ ಶ್ರೀ ರವಿಕುಮಾರ್ ಅವರು ಸ್ವಾಗತ ಭಾಷಣದ ಮೂಲಕ ಕಾರ್ಯಕ್ರಮವನ್ನು ವಿದ್ಯುಕ್ತವಾಗಿ ಆರಂಭಿಸಿದರು. ಕಾರ್ಯಕ್ರಮದ ನಿರೂಪಕಿಯಾದ ಶ್ರೀಮತಿ ಕವಿತಾ ರಾಮಕೃಷ್ಣ ಅವರು ಪುರಂದರದಾಸರ ಭವ್ಯ ಜೀವನದ ಕಿರು ಪರಿಚಯ ಮಾಡಿಸಿ, ವೇದಿಕೆಯನ್ನು ಪುರಂದರದಾಸಾಮೃತ ಗಾಯನಕ್ಕೆ ಸಜ್ಜುಗೊಳಿಸಿದರು.

ಮೊದಲಿಗೆ ವೇದಿಕೆಯನ್ನೇರಿದ ಓಂಕಾರ ಮಹಿಳಾ ವೃಂದವು- ಶರಣು ಸಿದ್ದಿ ವಿನಾಯಕ, ವೇಣುನಾಥ ಬಾರೋ, ಚಂದ್ರಚೂಡ ಶಿವಶಂಕರ, ರಾಮ ರಾಮ ಎನ್ನಿರೋ, ತೂಗಿರೆ ರಂಗನ- ಕೀರ್ತನೆಗಳ ರಸಾಮೃತವನ್ನು ಉಣಬಡಿಸಿದರು.

ನಂತರ ಶ್ರೀ ಗುರುರಾಘವೇಂದ್ರ ಪೂಜಾ ಸಮಿತಿಯು - ಗಜವದನ ಬೇಡುವೆ, ಅನುಭವದಡಿಗೆಯ ಮಾಡಿ, ಯಾರೇ ರಂಗನ, ಗೋವಿಂದ ನಿನ್ನ ನಾಮವೆ ಚಂದ, ಓಡಿ ಬಾರಿಯ ವೈಕುಂಠಕೆ, ಕಾಗದ ಬಂದಿದೆ, ಎಲ್ಲರು ಮಾಡುವುದು ಹೊಟ್ಟೆಗಾಗಿ, ನಾರಾಯಣ ನಿನ್ನ ನಾಮ-ಕೃತಿಗಳನ್ನು ಹಾಡಿ ಕಾರ್ಯಕ್ರಮದ ಕಳೆಯೇರಿಸಿದರು.

ಮುಂದೆ ವೇದಿಕೆಯನ್ನೇರಿದ ಕನ್ನಡ ಮಕ್ಕಳ ವೃಂದವು - ವಂದಿಸುವುದಾದಿಯಲಿ ಗಣನಾಥನ, ಆಚಾರ ವಿಲ್ಲದ ನಾಲಿಗೆ, ನಲಿದಾಡೆ ನನ್ನ ನಾಲಿಗೆ ಮೇಲೆ ಸರಸ್ವತಿ, ನಾರಾಯಣ ತೇ ನಮೋ, ಬಿಡುವೆನೇನಯ್ಯಾ ಹನುಮ - ಕೀರ್ತನೆಗಳನ್ನು ಸುಶಾೃವ್ಯವಾಗಿ ಹಾಡಿ ಪ್ರೇಕ್ಷಕರ ಮೆಚ್ಚುಗೆ ಗಳಿಸಿದರು.

ವೇದಿಕೆಯನ್ನೇರಿದ ನಾಲ್ಕನೇಯ ತಂಡವಾದ ಗೌಡ ಸಾರಸ್ವತ ಬ್ರಾಹ್ಮಣ ಭಜನಾ ವೃಂದವು - ನಿನ್ನ ನೋಡಿ ದಯನಾದೆನೋ, ಕರುಣಿಸೊ ರಂಗ, ಶೀೃನಿವಾಸ ನೀನೇ ಪಾಲಿಸೊ, ದಾಸನ ಮಾಡಿಕೊ ಎನ್ನ, ಯಾದವ ನೀ ಬಾ, ದಾಸರೆಂದರೆ ಪುರಂದರದಾಸರಯ್ಯಾ - ಕೃತಿಗಳನ್ನು ಭಕ್ತಿಭಾವದಿಂದ ಹಾಡಿ ಪ್ರೇಕ್ಷಕರನ್ನು ಭಕ್ತಿ ಮತ್ತು ಸಂಗೀತದ ಇನ್ನೊಂದು ಲೋಕಕ್ಕೆ ಕೊಂಡೊಯ್ದರು.

ಮುಂದೆ ಹಾಡಿದ ಶ್ರೀ ಗಣೇಶ ವೃಂದದವರು - ದೇವ ಬಂದ ನಮ್ಮ, ಹೂವು ತರುವರ ಮನೆಗೆ, ಮಧುಕರ ವೃತ್ತಿ, ರಾಗಿ ತಂದಿರಾ, ತತ್ತ ಧಿಮಿತ ಹರಿ ಆಡಿದನು, ನೀನೆ ಅನಾಥ ಬಂಧು, ಕಂಡು ಕಂಡು ನೀ ಎನ್ನ, ಬಾ ರಂಗ ಎನ್ನ ನಾಲಿಗೆಯೊಳು- ಎಂಬ ಕೃತಿಗಳನ್ನು ಸುಂದರವಾಗಿ ಎಲ್ಲರ ಮನ ಮುಟ್ಟುವಂತೆ ಪ್ರಸ್ತುತ ಪಡಿಸಿದರು.

ಇಷ್ಟರಲ್ಲಿ ಮಂಗಳದ ಸಮಯವಾಯಿತು. ಅದೇ ವೇಳೆಗೆ ವೇದಿಕೆಗೆ ಬಂದ ಮಸ್ಕತ್ತಿನ ಹಿರಿಯ ಗಾಯಕ ಶ್ರೀ ಎಂ, ಜಿ ಪೈ ಯವರು ಭಾಗ್ಯದ ಲಕ್ಷ್ಮಿ ಬಾರಮ್ಮ ಮತ್ತು ಮಂಗಳಗೀತೆಗಳನ್ನು ತಮ್ಮದೇ ಶೈಲಿಯಲ್ಲಿ ಹಾಡಿ ಪ್ರೇಕ್ಷಕರನ್ನು ಭಕ್ತಿರಸದ ಪರಮಾವಧಿಗೆ ಕೊಂಡೊಯ್ದರು. ಅದೇ ಸರಿಯಾಗಿ ಶ್ರೀ ಲಕ್ಷ್ಮೀನಾರಾಯಣ ಆಚಾರ್ಯರಿಂದ ಮಂಗಳಾರತಿಯೂ ಜರುಗಿತು.

ತರುವಾಯ ಓಂಕಾರ ಸಮಿತಿಯ ವತಿಯಿಂದ ಭಜನಾ ತಂಡಗಳನ್ನು ಮತ್ತು ಕಾರ್ಯಕ್ರಮದ ನಿರೂಪಕಿಯಾದ ಶ್ರೀಮತಿ ಕವಿತಾ ರಾಮಕೃಷ್ಣ ಅವರನ್ನು ಪುರಂದರ ಪ್ರಸಾದೊಂದಿಗೆ ಸನ್ಮಾನಿಸಲಾಯಿತು. ಕೊನೆಗೆ ಶ್ರೀಮತಿ ಸುಧಾ ಶಶಿಕಾಂತ್ ಅವರ ವಂದನಾರ್ಪಣೆಯೊಂದಿಗೆ ಕಾರ್ಯಕ್ರಮ ಯಶಸ್ವಿಯಾಗಿ ಮುಕ್ತಾಯಗೊಂಡಿತು. ಬಂದ ಅತಿಥಿಗಳಿಗೆಲ್ಲ ಪ್ರಸಾದ ವಿತರಣೆ ಮಾಡಲಾಯಿತು.

ಹೀಗೆ 'ಪುರಂದರ ನಮನ - 2016' ಭಕ್ತಿ ಮತ್ತು ಸಂಗೀತದ ಸುಂದರ ಸಂಯೋಗವಾಗಿ ಎಲ್ಲರ ಮೆಚ್ಚುಗೆಗೆ ಪಾತ್ರವಾಯಿತು. ಎಲ್ಲ ಸ್ಥಳೀಯ ಕಲಾವಿದರಿಗೆ ಅವಕಾಶವನ್ನು ಕೊಟ್ಟು ಕಾರ್ಯಕ್ರಮವನ್ನು ಸಮರ್ಪಕವಾಗಿ ಆಯೋಜಿಸಲಾಗಿದೆ ಎಂದು ಎಲ್ಲರೂ ಪ್ರಶಂಸಿಸಿದರು. ಇಲ್ಲಿಯೇ ಬೆಳೆದ ನಮ್ಮ ಮಕ್ಕಳು ಪುರಂದರ ದಾಸರ ಕೃತಿಗಳನ್ನು ಕಲಿಸುವಂತೆ ಮಾಡಿದ್ದು ಈ ಕಾರ್ಯಕ್ರಮದ ಹೆಗ್ಗಳಿಕೆ.

- ಶ್ರೀಮತಿ ಸುಧಾ ಶಶಿಕಾಂತ ಕೊಡಾಂಚ 

For program photos click here

ಪುರಂದರ ನಮನ -೨೦೧೫

ಪುರಂದರ ನಮನ -೨೦೧೫

ಓಂಕಾರ ಸಮಿತಿಯು ಶ್ರೀ ಪುರಂದರದಾಸರ ಪುಣ್ಯತಿಥಿಯ ಅಂಗವಾಗಿ ವಿನೂತನವಾದ ’ಪುರಂದರ ನಮನ-೨೦೧೫’ ಕಾರ್ಯಕ್ರಮವನ್ನು ದಿನಾಂಕ ೨೩-ಜನವರಿ-೨೦೧೫ರಂದು ಶ್ರೀ ಕೃಷ್ಣಮಂದಿರ ಸಭಾಂಗಣದಲ್ಲಿ ಆಯೋಜಿಸಲಾಗಿತ್ತು.

’ಪುರಂದರ ನಮನ’ ದಾಸವರೇಣ್ಯ ಮತ್ತು ಕರ್ನಾಟಕ ಸಂಗೀತದ ಪಿತಾಮಹ ಎಂದೇ ಪ್ರಖ್ಯಾತರಾಗಿರುವ ಶ್ರೀ ಪುರಂದರದಾಸರ ನೆನಪಿನಲ್ಲಿ ಅವರ ಕೃತಿಗಳ ಸಂಗೀತೋತ್ಸವವನ್ನು ಸ್ಥಳೀಯ ಕಲಾವಿದರಿಂದ ಆಚರಿಸುವ ಒಂದು ಮಹತ್ತರ ಕಾರ್ಯಕ್ರಮವಾಗಿದೆ.

ಆರಂಭಿಕವಾಗಿ ಸ್ವಾಗತ ಭಾಷಣ ಮಾಡಿದ ಶ್ರೀ ರವಿಕುಮಾರ ರಾವ್ ನಂತರ ವೇದಮೂರ್ತಿ ಶ್ರೀ ಲಕ್ಷ್ಮೀನಾರಾಯಣ ಆಚಾರ್ಯ ಅವರಿಂದ ಶ್ರೀ ಆಂಜನೇಯ ಸ್ವಾಮಿಯ ಪೂಜೆ, ಶ್ರೀ ಗುರುರಾಘವೇಂದ್ರ ಸ್ವಾಮಿಗಳ ಪೂಜೆ ನಂತರ ಶ್ರೀ ಪುರಂದರದಾಸರ ಪೂಜೆಯೊಂದಿಗೆ ಕಾರ್ಯಕ್ರಮಕ್ಕೆ ಚಾಲನೆ ನೀಡಲಾಯಿತು.

ಪೂಜೆಯ ನಂತರ ಸಂಗೀತ ಕಾರ್ಯಕ್ರಮ ಸದಸ್ಯರ ಮಕ್ಕಳಾದ ಕು. ಅಮೂಲ್ಯ, ಕು. ಅನಘ ಉಡುಪ, ಕು. ನಿಖಿತಾ, ಕು. ಸ್ಮೃತಿ ಪ್ರಭು, ಕು. ರಿಷಭ ರಾವ್, ಕು. ಕುಶಲ ರಾಜು ಇವರಿಂದ ’ಲಂಬೋದರ’, ’ಪಿಳ್ಳಾರಿ ಗೀತೆ’, ’ರಾಗಿ ತಂದೀರಾ’ ಮುಂತಾದ ಹಾಡುಗಳಿಂದ ಸಂಗೀತೋತ್ಸವಕ್ಕೆ ಶುಭಾರಂಭ ನೀಡಿತು.

ಶ್ರೀ ಏ ಎಸ್ ರವಿಪ್ರಕಾಶ ಅವರ ಸುಮಧುರ ಕಂಠದಿಂದ ’ಯಾರೇ ಬಂದವರು’, ’ಬಾರೋ ನೀ ಎನ್ನ’ ಮತ್ತು ’ಶಕ್ತನಾದರೆ’ ಹಾಡುಗಳ ಸುರಿಮಳೆಯಾದರೆ, ನಂತರ ಶ್ರೀಮತಿ ಕಲಾ ಶ್ರೀನಿವಾಸನ್ ಅವರಿಂದ ಜಲತರಂಗದಿಂದ ’ಭಾಗ್ಯದ ಲಕ್ಷ್ಮೀ ಬಾರಮ್ಮ’ ಹಾಡಿನ ಸಂಗೀತ ಹೊರಹೊಮ್ಮಿತು. ಶ್ರೀಮತಿ ಶುಭಾ ಶ್ರೀನಿವಾಸರಿಂದ ’ದೇವಕಿ ಕಂದ ಮುಕುಂದ’ ಎಲ್ಲರನ್ನು ಮುಗ್ಧರನ್ನಾಗಿಸಿತು.

ಹೀಗೆ ಸಂಗೀತದ ರಥವನ್ನು ಶ್ರೀ ಸಚಿನ್ ಕಾಮತರು ’ನಾನೇನ ಮಾಡಿದೆನೋ ರಂಗಯ್ಯ’, ’ಕಲಿಯುಗದೊಳು’ ಮತ್ತು ’ಪಿಳ್ಳಂಗೋವಿಯ’ ತಮ್ಮ ಹಾಡಿನ ಶೈಲಿಯಿಂದ ಪುರಂದರ ನಮನ ಕಾರ್ಯಕ್ರಮವನ್ನು ಮತ್ತೊಂದು ಎತ್ತರಕ್ಕೆ ಕೊಂಡೊಯ್ದರೆಂದರೆ ತಪ್ಪಾಗಲಾರದು. ತದನಂತರ ಶ್ರೀಮತಿ ವೀಣಾ ಶ್ರೀನಿವಾಸರಿಂದ ’ತಾರಕ್ಕೆ ಬಿಂದಿಗೆ’, ’ಜಗದೋದ್ದಾರನ’ ಮತ್ತು ’ರಾಮ ಮಂತ್ರವ ಜಪಿಸೋ’ ಹಾಡುಗಳು ಕರ್ನಾಟಕ ಸಂಗೀತದ ಸಿಹಿ ಎಲ್ಲರಿಗೂ ತಲುಪುವಂತಾಯಿತು.

ಬೆಳೆಯುತ್ತಿರುವ ಪ್ರತಿಭೆಗಳಾದ ಕು. ಸಾಕ್ಷಿ ಭಾಗವತ್ ಮತ್ತು ಕು. ಪ್ರೀತಿ ಕೋಡಂಚ ಇವರ ’ವಾಸುದೇವ ಚರಣ’, ’ಸುಲಭ ಪೂಜೆಯ ಮಾಡಿ’ ಮತ್ತು ’ದಾರಿ ಯಾವುದಯ್ಯ’ ಹಾಡುಗಳು ನಮ್ಮ ಮುಂದಿನ ಪೀಳಿಗೆಯಲ್ಲಿರುವ ಕಲೆಯನ್ನು ತೋರಿಸಿಕೊಟ್ಟವು. ನಂತರ ಶ್ರೀಮತಿ ಸ್ವರ್ಣಲತಾ ಹೆಬ್ಬಾರ ಇವರಿಂದ ಸುಮಧುರವಾಗಿ ’ಮನವೇ ಚಂಚಲ’, ’ನಿನ್ನನೇ ನಂಬಿದೆ’ ’ಮುರೂತಿಯನ್ನು ತೋರಿಸೋ’ ಹಾಡುಗಳು ಹರಿದು ಬಂದವು.

ಶ್ರೀಮತಿ ಸುಮನಾ ಶಶಿಧರ ಇವರ ಕಂಠಸಿರಿಯಿಂದ ’ಅಂಬಿಗ ನಾ ನಿನ್ನ’, ಮಂದಗಮನೆ’ ಮತ್ತು ’ಗುಮ್ಮನ ಕರೆಯದಿರೆ’ ಹಾಡುಗಳಾದರೆ ಮಸ್ಕತ್ ನಲ್ಲಿ ತಮ್ಮ ಸಂಗೀತ ಶೈಲಿ ಮತ್ತು ಸಂಗೀತ ಸೇವೆಗೆ ಮನೆಮಾತಾಗಿರುವ ಶೀ ಕರುಣಾಕರ ರಾವ್ ಅವರಿಂದ ’ಕೇಳನೋ ಹರಿ ತಾಳನೋ’, ’ಕರುಣಿಸೋ ರಂಗ ಕರುಣಿಸೋ’ ಮತ್ತು ’ಹರಿ ಕುಣಿದ ನಮ್ಮ ಹರಿ ಕುಣಿದಾ’ ಹಾಡುಗಳು ಎಲ್ಲ ಪ್ರೇಕ್ಷಕ ವರ್ಗವನ್ನು ಮೆಚ್ಚುವಂತೆ ಮಾಡಿತು.

ಕೊನೆಗೆ ಶ್ರೀಯುತ ಗಣಪತಿ ಪೈ ಅವರಿಂದ ಸೋಹಿಣಿ, ದರ್ಬಾರಿ ಮತ್ತು ಭೈರವಿ ರಾಗದಲ್ಲಿ ’ಈ ಪರಿಯ ಸೊಬಗು’ ಮತ್ತು ’ಕೋಮಲಾಂಗ ನಮ್ಮ’ ಹಾಡುಗಳು ಸಭಾಂಗಣವನ್ನು ಮಂತ್ರ ಮುಗ್ಧರನ್ನಾಗಿಸಿದ್ದವು.

ಸಂಗೀತ ವಾದ್ಯ ವೃಂದದಲ್ಲಿ ವಿದ್ವಾನ್ ಶ್ರೀ ಸುಂದರೇಶನ್, ಶ್ರೀ ಕರುಣಾಕರ ರಾವ್ (ಹಾರ್ಮೋನಿಯಮ್), ಶ್ರೀ ನವೀನ ಆಚಾರ್ಯ (ತಬಲಾ), ಶ್ರೀ ಗಿರೀಶ ನಾಯಕ (ತಬಲಾ), ಶ್ರೀ ಸುರೇಂದ್ರ ಆಚಾರ್ಯ (ಹಾರ್ಮೋನಿಯಮ್), ಕು. ಅರುಣಕುಮಾರ್ (ವಯೋಲಿನ್), ಕು. ಪ್ರೀತಿ ಕೋಡಂಚ (ವಯೋಲಿನ್) ಮತ್ತು ಕು. ಸಂತೃಪ್ತ ವೇದಾಂತಿ ಭಾಗವಹಿಸಿದ್ದರು.

ಶ್ರೀಮತಿ ಕವಿತಾ ರಾಮಕೃಷ್ಣ ಅವರ ಕಾರ್ಯಕ್ರಮ ನಿರೂಪಣೆ ಅವರ ಪೂರ್ವ ತಯಾರಿ ಮತ್ತು ಶ್ರೀ ಪುರಂದರದಾಸರ ಬಗೆಗಿನ ಮಾಹಿತಿ ಸಂಗ್ರಹ ಕಾರ್ಯಕ್ರಮಕ್ಕೆ ಹೊಸ ರಂಗು ಕೊಟ್ಟಿತ್ತು.

ಶ್ರೀ ಸಿ ಕೆ ಅಂಚನ ಮತ್ತು ಶ್ರೀ ಜಿ ವಿ ರಾಮಕೃಷ್ಣ ಅವರಿಂದ ಭಾಗವಹಿಸಿದ ಎಲ್ಲ ಕಲಾವಿದರಿಗೆ ’ಪುರಂದರ ನಮನ-೨೦೧೫’ ಕಾರ್ಯಕ್ರಮದ ನೆನಪಿನ ಕಾಣಿಕೆಯನ್ನು ನೀಡಲಾಯಿತು.

ಶ್ರೀ ವೆಂಕಟೇಶ ಗುಡಗುಡಿ ಇವರಿಂದ ವಂದನಾರ್ಪಣೆಯೊಂದಿಗೆ ಕಾರ್ಯಕ್ರಮ ಸಂಪನ್ನಗೊಂಡಿತು ಮತ್ತು ಓಂಕಾರ ಸಮಿತಿಯ ಪರವಾಗಿ ಪ್ರಸಾದ ವಿತರಣೆಯ ವ್ಯವಸ್ಥೆ ಮಾಡಲಾಗಿತ್ತು.

ಓಂಕಾರ ಪುರಂದರ ನಮನ-೨೦೧೫ (ಭಾಗ-೧)

ಓಂಕಾರ ಪುರಂದರ ನಮನ-೨೦೧೫ (ಭಾಗ-೨)