ಓಂಕಾರ ನಾದಾಮೃತ -೨೦೨೪

ಓಂಕಾರ ಗಣವಂದ್ಯಾಯ ಜ್ಞಾನಾನಂದೈಕ ಮೂರ್ತಯೇ ।

ಸುಗುಣೇಂದ್ರನುತಾಯ ಶ್ರೀ ಕಪಿಂದ್ರಾಯ ನಮೋ ನಮಃ ।।

ಅಕ್ಟೋಬರ್ 27, 2024 ಶುಕ್ರವಾರದ ಶುಭ ಸಂಜೆ 6:00 ಘಂಟೆಗೆ ಸರಿಯಾಗಿ ಮಸ್ಕತ್ ಶ್ರೀ ಕೃಷ್ಣ ಮಂದಿರದ ಸಭಾಂಗಣ ಸುಂದರವಾಗಿ ಅಲಂಕೃತವಾಗಿತ್ತು. ಓಮಾನ್ ಕರ್ನಾಟಕ ಆರಾಧನಾ ಸಮಿತಿಯು ಓಂಕಾರ ನಾದಾಮೃತ 2024ರ ಭಕ್ತಿಸಂಗೀತ ಕಾರ್ಯಕ್ರಮವನ್ನು ಸಾಕಾರಗೊಳಿಸಲು ನಮ್ಮ ತಾಯ್ನಾಡಿನಿಂದ ಆಗಮಿಸಿದ ಗಾನಕೋಗಿಲೆ ಕು. ಸಾಧ್ವಿನಿ ಕೊಪ್ಪ ಮತ್ತು ತಂಡದವರಿಗಾಗಿ ಸುಸಜ್ಜಿತ ವೇದಿಕೆ ತಯಾರಾಗಿತ್ತು. ರಾಮನಾಮದ ಓಂಕಾರದ ಜೊತೆಗೆ ಹನುಮ ನಾಮದ ಜೈಕಾರಕ್ಕಾಗಿ ಮಸ್ಕತ್ತಿನ ಸಂಗೀತ ಪ್ರೇಮಿಗಳೆಲ್ಲರೂ ಉತ್ಸುಕರಾಗಿದ್ದರು. ಓಂಕಾರ ಸಮಿತಿಯ ಶ್ರೀ ರವಿಕುಮಾರ್ ಅವರು ಸ್ವಾಗತಭಾಷಣ ಆರಂಭಿಸಿ ಆಗಮಿಸಿದ್ದ ಮುಖ್ಯ ಅತಿಥಿಗಳಿಗೆ ಹೂಗುಚ್ಚ ನೀಡಿ ಹಾಗೂ ನೆರೆದಿದ್ದ ಸಭಿಕರಿಗೆ ಆತ್ಮೀಯತೆಯಿಂದ ಹೃತ್ಪೂರ್ವಕ ಸ್ವಾಗತ ಕೋರುತ್ತ ಓಂಕಾರ ಸಮಿತಿಯ ಹನ್ನೆರಡು ವರ್ಷದ ಸತತ ಸಾಧನೆಯ ಕಿರುನೋಟವನ್ನು ನೆನಪಿಸಿ ಕೊಟ್ಟರು.

ನಂತರ ಶ್ರೀಮತಿ ಮುಕ್ತಾ ಪ್ರವೀಣ ಅವರಿಂದ ಗಾನಶ್ರೀ ಕು. ಸಾಧ್ವಿನಿ ಕೊಪ್ಪರವರ ಪರಿಚಯದೊಂದಿಗೆ ಸಂಗೀತದ ನಾಡಿಮಿಡಿತಗಳಾದ ಕೀಬೋರ್ಡ್ ವಾದಕ ಶ್ರೀಯುತ ಶ್ರೀನಿಧಿ ಕೊಪ್ಪ, ರಿದಮ್ ಪ್ಯಾಡ್ ಪರಿಣಿತ ಅಭಿಷೇಕ್ ಎಂ ಎ, ತಬಲಾ ಮಾಂತ್ರಿಕ ಶ್ರೀ ಕಾರ್ತಿಕ್ ಭಟ್ ಹಾಗೂ ಸ್ಥಳೀಯ ಕೊಳಲು ವಾದಕರಾದ ಶ್ರೀ ಪ್ರದೀಪ್ ಕುಮಾರ್ ರವರ ಕಿರು ಪರಿಚಯ ಮಾಡಿಸಿ ಕಾರ್ಯಕ್ರಮದ ನಿರೂಪಣೆ ಮಾಡಿದರು. ಶ್ರೀ ಅರುಣಕುಮಾರ್ ಅಯ್ಯರ್ ಅವರು ಆದಿಪೂಜಿತ ಶ್ರೀ ಗಣಪತಿಗೆ ಹಾಗೂ ಓಂಕಾರ ಸಮಿತಿಯ ಆರಾಧ್ಯ ದೈವ ಹಾಗೂ ಚೈತನ್ಯ ಮೂರ್ತಿ ಶ್ರೀ ಆಂಜನೇಯ ಸ್ವಾಮಿಗೆ ಆರತಿ ಮಾಡುವುದರ ಮೂಲಕ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು.

ಭಾರತದಲ್ಲಿ ಸಂಗೀತ ಪಡೆದ ನಾವು ಎಷ್ಟು ಪುಣ್ಯವಂತರು ಎಂದು ಹೇಳುತ್ತಾ ಕು ಸಾದ್ವಿನಿ ಕೊಪ್ಪರವರು "ಗಣಪತಿ ಬಪ್ಪ ಮೋರಯಾ ಮಂಗಳ ಮೂರ್ತಿ ಮೋರಯಾ" ಹಾಡುತ್ತಾ ಗಣಪತಿಗೆ ವಂದಿಸಿ ಕಾರ್ಯಕ್ರಮ ಪ್ರಾರಂಭಿಸಿದರು. ನಂತರ "ಶಂಭೋ ಶಿವ ಶಂಭೋ" ಹಾಡಿ, ಶ್ರೀಕೃಷ್ಣನ ಸಾನಿಧ್ಯದಲ್ಲಿ "ಸ್ವಾಗತಂ ಕೃಷ್ಣ ಶರಣಾಗತಂ ಕೃಷ್ಣ" ಎಂದು ಕೃಷ್ಣನನ್ನು ಆಹ್ವಾನಿಸಿದರು. ಮುಂದೆ "ರಾಮ ಎಂಬ ಎರಡಕ್ಷರ ಪಾಮರರು ತಾವೇನು ಬಲ್ಲಿರಯ್ಯಾ" ಎಂಬ ದಾಸಸಾಹಿತ್ಯದ ಮಹತ್ವವನ್ನು ಎಷ್ಟೊಂದು ಸ್ವಾರಸ್ಯವಾಗಿ ನಮಗೆ ಹಾಡಿ ತಿಳಿಸಿದರು. ಆಂಜನೇಯನ ಭಜನೆಯಾದ "ಜೈ ಜೈ ಹನುಮಾನ್ ಜೈ ಗುರು ಜೈ ಜೈ ಪವಮಾನ್ ಎಂದು ಎಲ್ಲರೂ ಕುಣಿದು ಕುಪ್ಪಳಿಸುವಂತೆ ಮಾಡಿದರು. ಹೀಗೆ ಒಂದರ ನಂತರ ಇನ್ನೊಂದು ಹಾಡು ಪ್ರತಿಯೊಬ್ಬ ಪ್ರೇಕ್ಷಕರನ್ನು ಮಂತ್ರಮುಗ್ಧನನ್ನಾಗಿಸುತ್ತಿತ್ತು. ಸುಸ್ವರ ಸಂಗೀತದೊಂದಿಗೆ ಪ್ರತಿಯೊಂದು ಹಾಡಿನ ವಿಶೇಷತೆಗಳನ್ನು ತಿಳಿಸಿ ಕೊಡುತ್ತ ತಾವು ಹಾಡುತ್ತ ಪ್ರೇಕ್ಷಕರನ್ನು ಜೊತೆಗೆ ಹಾಡಲು ಪ್ರೋತ್ಸಾಹಿಸುತ್ತಿದ್ದರು.

ಕಾರ್ಯಕ್ರಮದಲ್ಲಿ ಕಲಾವಿದರನ್ನು ಗೌರವಿಸಿ ಸನ್ಮಾನಿಸುವದೂ ಮುಖ್ಯ ಎಂಬಂತೆ ಮಸ್ಕತ್ ನ ಇಂಡಿಯನ್ ಡಾಕ್ಟರ್ಸ್ ಅಸೋಸಿಯೇಷನ್ ಕರ್ನಾಟಕ ವಿಭಾಗದವರು ಕು ಸಾಧ್ವಿನಿ ಕೊಪ್ಪ ಅವರನ್ನು ಸನ್ಮಾನಿಸಿದರು. ತದನಂತರ ಉಪಸ್ಥಿತರಿದ್ದ ಗಣ್ಯರಿಂದ ರಿದಮ್ ಪ್ಯಾಡ್ ಕಲಾವಿದ ಅಭಿಷೇಕ ಎಂ ಎ, ತಬಲಾ ವಾದಕ ಕಾರ್ತೀಕ ಭಟ್, ಕೊಳಲು ವಾದಕ ಪ್ರದೀಪ್ ಕುಮಾರ ಹಾಗೂ ಕೀಬೋರ್ಡ್ ವಾದಕರಾದ ಶ್ರೀನಿಧಿ ಕೊಪ್ಪರವರನ್ನು ಓಂಕಾರ ಸಮಿತಿಯ ಪರವಾಗಿ ಸನ್ಮಾನಿಸಿದರು. ನಂತರ ಓಂಕಾರ ಸಮಿತಿಯ ಎಲ್ಲ ಸದಸ್ಯರು ವೇದಿಕೆಗೆ ಆಗಮಿಸಿ ನಾದಾಮೃತ 2024ರ ಕಾರ್ಯಕ್ರಮದ ಕೇಂದ್ರ ಬಿಂದುವಾದ ಹೆಮ್ಮೆಯ ಕನ್ನಡತಿ ಕು ಸಾಧ್ವಿನಿ ಕೊಪ್ಪ ಅವರಿಗೆ ಗೌರವಪೂರ್ವಕವಾಗಿ ಸ್ಮರಣಿಕೆಯನ್ನು ನೀಡಿ ಗೌರವಿಸಿದರು. ಮನೆಗೆ ಬಂದು ಹೆಣ್ಣುಮಕ್ಕಳಿಗೆ ಸಂಪ್ರದಾಯದಂತೆ ಬಾಗಿನ ಕೊಟ್ಟು ಖುಷಿಯಿಂದ ಕಳುಹಿಸಿಕೊಡುವ ಹಾಗೆ ನಮ್ಮ ಓಂಕಾರ ಸಮಿತಿಯ ಮಹಿಳೆಯರು ಕು ಸಾಧ್ವಿನಿ ಕೊಪ್ಪ ಅವರಿಗೆ ಬಾಗಿನ ನೀಡಿ ಭಾವನಾತ್ಮಕವಾದ ಶುಭ ಹಾರೈಸಿದರು.

ಕಾರ್ಯಕ್ರಮ ಮುಂದುವರಿದು "ರಘುಕುಲ ನಂದನ ರಾಜಾರಾಮ ಕರುಣಾಸಾಗರ ಶ್ರೀ ಸೀತಾರಾಮ" ಎಂದು ಇಡೀ ರಾಮಾಯಣವನ್ನು ನಮಗೆ ತಿಳಿಸಿಕೊಟ್ಟರು. ಅದರ ಜೊತೆಗೆ ನಮ್ಮನ್ನು ಭಕ್ತಿಯಲ್ಲಿ ತಲ್ಲೀನರಾಗಿಸಿದರು. ವಿಠ್ಠಲನ ಭಜನೆಯಂತೂ ಪಂಡರಪುರಕ್ಕೆ ಹೋಗಿ ಬಂದಂತಿತ್ತು. "ವಿಠ್ಠಲ ವಿಠ್ಠಲ" ಎಂದು ಕಣ್ಣು ಭಜನೆ ಮಾಡುತ್ತಿದ್ದರೆ ಸ್ವತಃ ಪಾಂಡುರಂಗನೇ ಕಣ್ಣು ಮುಂದೆ ಬಂದಂತಹ ಅನುಭವ ಆಗಿತ್ತು. ಭಜನೆ ಮಾಡುತ್ತಾ ಓಂಕಾರ ಸಮಿತಿಯ ಸದಸ್ಯರುಗಳು ನೃತ್ಯವಂತೂ ಸಭಿಕರೆಲ್ಲರಲ್ಲಿ ಒಂದು ಅದ್ಭುತವಾದ ಖುಷಿ ತಂದುಕೊಟ್ಟಿತು. "ಜಗದೋದ್ಧಾರನ ಆಡಿಸಿದಳು ಯಶೋಧೆ" ಹಾಗೂ "ಕಾನಡಾ ರಾಜಾ ಪಂಡರೀಚಾ" ಎಂಬ ಮರಾಠಿ ಹಾಡುಗಳು ಸಭಿಕರ ಮನಸ್ಸಿಗೆ ಆನಂದ ತಂದುಕೊಟ್ಟವು. ಭಕ್ತಿಗೀತೆ ಜೊತೆಗೆ ಮೂಡಲಮನೆ ಧಾರವಾಹಿಯ ಖ್ಯಾತ ಶೀರ್ಷಿಕೆಯ ಹಾಡು "ನಂಬಿ ಕೊಂಬೆಯ ಮೇಲೆ ಗೂಡು ಕಟ್ಟುತವ ರೆಕ್ಕೆ ಬಲಿತ ಹಕ್ಕಿ" ಎಂದು ಅದೇ ಭಾಷೆಯ ಸೊಗಡಿನಲ್ಲಿ ಹಾಡಿದ್ದು ಇನ್ನೊಂದು ವಿಶೇಷತೆಯಾಗಿತ್ತು. ಅದರ ಜೊತೆಗೆ "ಉಧೋ ಉಧೋ ಎಲ್ಲಮ್ಮ" ಎಂಬ ರೇಣುಕೆ ಎಲ್ಲಮ್ಮನ ಹಾಡು ಪ್ರೇಕ್ಷಕರ ವಿಶೇಷ ಮನಸೆಳೆದಿತ್ತು. ಇನ್ನೂ ಭಕ್ತಿಯಲ್ಲಿ ಮಗ್ನರಾಗಿದ್ದ ಸಂಗೀತ ಪ್ರಿಯರಿಗೆ ಕಾರ್ಯಕ್ರಮ ಹೇಗೆ ಮುಕ್ತಾಯದ ಹಂತಕ್ಕೆ ಬಂತು ಅಂತ ಗೊತ್ತಾಗಲಿಲ್ಲ. ಕಡೆಯದಾಗಿ ಸಭಿಕರ ಕೋರಿಕೆಯ ಮೇರೆಗೆ "ಭಾಗ್ಯದ ಲಕ್ಷ್ಮಿ ಬಾರಮ್ಮ" ಮತ್ತು "ಪವಮಾನ ಜಗದ ಪ್ರಾಣ" ಹಾಡುಗಳ ಮೂಲಕ ಮಂಗಳ ಹಾಡಿದರು. ಹೀಗೆ ಸತತವಾಗಿ ಮೂರು ಗಂಟೆಗಳ ಕಾಲ ಶ್ರದ್ಧಾ ಭಕ್ತಿಯಿಂದ ಸುಶ್ರಾವ್ಯವಾಗಿ, ಸುಮಧುರವಾಗಿ ಹಾಡಿದ ಕುಮಾರಿ ಸಾಧ್ವಿನಿ ಕೊಪ್ಪ ಅವರು ಪ್ರತಿಯೊಬ್ಬ ಪ್ರೇಕ್ಷಕನನ್ನು ಭಗವಂತನ ಕೃಪಾಕಟಾಕ್ಷಕ್ಕೆ ಪಾತ್ರರನ್ನಾಗಿಸಿದಂತೂ ಸತ್ಯ.

ಶ್ರೀಯುತ ಅರುಣ ಹೊಳ್ಳರವರು ವೇದಿಕೆಗೆ ಆಗಮಿಸಿ, ತಮ್ಮ ಕಂಠಸಿರಿಯಿಂದ ಸಭಿಕರನ್ನು ಭಕ್ತಿ ಲೋಕಕ್ಕೆ ಕರೆದೊಯ್ದ ಕು. ಸಾಧ್ವಿನಿ ಕೊಪ್ಪ ಮತ್ತು ತಂಡದವರಿಗೆ, ಮಂದಿರದ ಆಡಳಿತ ಮಂಡಳಿಗೆ, ಕಾರ್ಯಕ್ರಮಕ್ಕೆ ಪ್ರತ್ಯಕ್ಷವಾಗಿ ಅಥವಾ ಪರೋಕ್ಷವಾಗಿ ಸಹಾಯ ಮಾಡಿದ ಎಲ್ಲರಿಗೂ, ಸಭಿಕರಿಗೆ ಮತ್ತು ಓಂಕಾರ ಸಮಿತಿಯ ತಂಡದ ಎಲ್ಲಾ ಸದಸ್ಯರಿಗೆ ವಂದನೆಯನ್ನು ಸಲ್ಲಿಸಿ ಕಾರ್ಯಕ್ರಮಕ್ಕೆ ಮುಕ್ತಾಯ ಹೇಳಿದರು. ಉಪಸ್ಥಿತರಿದ್ದ ಎಲ್ಲ ಪ್ರೇಕ್ಷಕರಿಗೆ ಹಣ್ಣು ಹಾಗೂ ಲಘು ಉಪಹಾರದ ವ್ಯವಸ್ಥೆಯನ್ನು ಕೂಡ ಮಾಡಲಾಗಿತ್ತು.

ಲೇಖನ : ಶ್ರೀಮತಿ ಮುಕ್ತಾ ಪ್ರವೀಣ್

ಓಂಕಾರ ನಾದಾಮೃತ -೨೦೨೩

ಓಂಕಾರ ನಾದಾಮೃತ ೨೦೨೩

ಓಂಕಾರ ಗಣವಂದ್ಯಾಯ ಜ್ಞಾನಾನಂದೈಕ ಮೂರ್ತಯೇ |

ಸುಗುಣೇಂದ್ರನುತಾಯ ಶ್ರೀ ಕಪೀಂದ್ರಾಯ ನಮೋ ನಮಃ ||

ದಿನಾಂಕ ೨೮.೧೦.೨೦೨೩ ಶನಿವಾರ ಶುಭಸಾಯಂಕಾಲ ೬ ಘಂಟೆಗೆ ಸರಿಯಾಗಿ ಮಸ್ಕತ್ ನ ಶ್ರೀಕೃಷ್ಣಮಂದಿರದ ಸಭಾಂಗಣ ಸುಂದರವಾಗಿ ಅಲಂಕೃತವಾಗಿತ್ತು. ಓಮಾನ್ ಕರ್ನಾಟಕ ಆರಾಧನಾ  (ಓಂಕಾರ)  ಸಮಿತಿಯ ಓಂಕಾರ ನಾದಾಮೃತ-೨೦೨೩ ರ ಭಕ್ತಿಸಂಗೀತದ ಕಾರ್ಯಕ್ರಮವನ್ನು ಸಾಕಾರಗೊಳಿಸಲು ಕರ್ನಾಟಕದ ಸಾಂಸ್ಕೃತಿಕ ನಗರಿ ಮೈಸೂರಿನಿಂದ ಆಗಮಿಸಿದ್ದ ಸಾಧಕರತ್ನ ಶ್ರೀ ಶ್ರೀಹರ್ಷ ಮತ್ತು ತಂಡದವರಿಗಾಗಿ ಸುಸಜ್ಜಿತವಾದ ವೇದಿಕೆಯೂ ತಯಾರಾಗಿತ್ತು.ರಾಮನಾಮದ ಓಂಕಾರದ ಜೊತೆಗೆ ಹನುಮ ನಾಮದ ಝೇಂಕಾರಕ್ಕಾಗಿ ಮಸ್ಕತ್ ನ ಸಂಗೀತ ಪ್ರೇಮಿಗಳೆಲ್ಲರೂ ಉತ್ಸುಕರಾಗಿದ್ದರು.

ಓಂಕಾರ ಸಮಿತಿಯ ಶ್ರೀರವಿಕುಮಾರ್ ಅವರು ಆತ್ಮೀಯತೆಯಿಂದ ಸ್ವಾಗತಕೋರಿ   ಆಗಮಿಸಿದ್ದ ಮುಖ್ಯ ಅತಿಥಿಗಳಿಗೆ ಹೂಗುಚ್ಚ ನೀಡಿ  ಅಹ್ವಾನಿಸಿದರು ಹಾಗೂ ನೆರೆದಿದ್ದ ಸಭಿಕರಿಗೆ ಹೃತ್ಪೂರ್ವಕ ಸ್ವಾಗತವನ್ನು ಕೋರಿ, ಓಂಕಾರ ಸಮಿತಿಯ ೧೧ವರ್ಷಗಳ ಸತತ ಸಾಧನೆಯ ಕಿರುನೋಟವನ್ನು ನೆನಪಿಸಿದರು.

ನಂತರ ಶ್ರೀಮತಿ ಶ್ರೀಮಾತ ಹಿರಿಯಣ್ಣ ಅವರಿಂದ ಸಾರಸ್ವತಸರದಾರ ಶ್ರೀ ಶ್ರೀಹರ್ಷರವರ ಪರಿಚಯ ಹಾಗೆಯೇ ಸಂಗೀತದ ನಾಡಿಮಿಡಿತಗಳಾದ ಕೀಬೋರ್ಡ್ ವಾದಕ ಶ್ರೀ ಷಣ್ಮುಗ ಸಜ್ಜ, ರಿದಮ್ ಪ್ಯಾಡ್ ನ ಶ್ರೀ ವಿನಯ್ ರಂಗಧೂಲ್ ಹಾಗೂ ತಬಲಾವಾದ್ಯ ನಿಪುಣ ಶ್ರೀ ಆತ್ಮರಾಂ ಬಿ ರವರ ಕಿರುಪರಿಚಯ ಮಾಡಿಸಿ ಕಾರ್ಯಕ್ರಮದ ನಿರೂಪಣೆ ಮಾಡಿದರು.

ಶ್ರೀ ಅರುಣ್ ಕುಮಾರ್ ಐಯ್ಯರ್ ಅವರು ಓಂಕಾರ ಸಮಿತಿಯ ಆರಾಧ್ಯ ದೈವ, ಚೈತನ್ಯ ಮೂರುತಿ ಆಂಜನೇಯಸ್ವಾಮಿಗೆ ಮಂಗಳಾರತಿ ಬೆಳಗುವುದರ ಮೂಲಕ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು.

ಶ್ರೀಹರ್ಷ ಅವರು ಆದಿವಂದ್ಯ ಗಣೇಶನ ಸ್ತುತಿ ಗಜವದನ ಹೇರಂಬ ಎಂದು ಪ್ರಾರಂಭಿಸಿ ವಾಗ್ದೇವಿಯನ್ನು ಪ್ರಾರ್ಥಿಸಿ ಮಾಣಿಕ್ಯವೀಣಾ ಮುಪಲಾಲಯಂತಾಂ ಶ್ಲೋಕವನ್ನು ಭಕ್ತಿ-ಭಾವ ಪರವಶರಾಗಿ ಹಾಡಿದರು. ನಂತರ ಗುರುವನ್ನು ವಂದಿಸುತ್ತಾ ಪಂಡಿತ್ ಪುಟ್ಟರಾಜ ಗವಾಯಿಗಳ ಗಾನವಿದ್ಯಾಬಹುತ್ ಕಠಿಣ್ ಹೇ, ತೊರೆದು ಜೀವಿಸಬಹುದೇ ಹರಿ ನಿನ್ನ ಚರಣಗಳ, ಗುಡಗುಡಿಯ ಸೇದುವ ಮಹಾ ತತ್ವ ದ ಹಾಡು ಹೀಗೆ ಒಂದರ ನಂತರ ಇನ್ನೊಂದು ಹಾಡು ಪ್ರತಿಯೊಬ್ಬ ಪ್ರೇಕ್ಷಕನನ್ನು ಮಂತ್ರಮುಗ್ಧನನ್ನಾಗಸಿತ್ತು.

ಸುಸ್ವರ ಸಂಗೀತದೊಂದಿಗೆ, ಪ್ರತಿಯೊಂದು ಹಾಡಿಗೂ ವಿವರಗಳನ್ನು ಹಾಗೂ ಹಾಡಿನ ವಿಷೇಷಣ ವಿಶೇಷತೆಗಳನ್ನು ತಿಳಿಸಿಕೊಡುತ್ತಿದ್ದ ಶ್ರೀ ಶ್ರೀಹರ್ಷ ಮತ್ತು ಅವರ ತಂಡದವರಿಗೆ ಕಾರ್ಯಕ್ರಮದ ಮಧ್ಯದಲ್ಲಿ ಮಸ್ಕತ್ತಿನ ಭಾರತೀಯ ಸಾಮಾಜಿಕ ಒಕ್ಕೂಟ - ಕರ್ನಾಟಕ ವಿಭಾಗದವರು ಶ್ರೀಹರ್ಷ ಅವರನ್ನು ನೆನಪಿನ ಕಾಣಿಕೆಯೊಂದಿಗೆ ಸನ್ಮಾನಿಸಿದರು.

ತದನಂತರ ಮಸ್ಕತ್ ನ ಆಗಮಿಸಿದ ಗಣ್ಯರಿಂದ  ಎಲ್ಲ ಕಲಾವಿದರನ್ನು ಓಂಕಾರ ಸಮಿತಿಯ ಪರವಾಗಿ ಸನ್ಮಾನಿಸಲಾಯಿತು.

ನಂತರ ಓಂಕಾರ ಸಮಿತಿಯ ಎಲ್ಲ ಸದಸ್ಯರು ವೇದಿಕೆಗೆ ಆಗಮಿಸಿ ನಾದಾಮೃತ ೨೦೨೩ ರ ಕಾರ್ಯಕ್ರಮದ ಕೇಂದ್ರಬಿಂದುವಾದ ಹೆಮ್ಮೆಯ ಕನ್ನಡಿಗ ಶ್ರೀ ಹರ್ಷ ಅವರಿಗೆ “ಓಂಕಾರಶ್ರೀ “ ಎಂಬ ವಿಶೇಷ ಬಿರುದು ನೀಡಿ ಗೌರವ ಸಲ್ಲಿಸಿದರು.

ಕಾರ್ಯಕ್ರಮದ ಮುಂದುವರೆದ ಭಾಗದಲ್ಲಿ ನಿಂದಾಸ್ತುತಿ, ಈಶ ನಿನ್ನ ಚರಣ ಭಜನೆ, ದೇವಕಿಕಂದ ಮುಕುಂದ, ಕಂಡೆನಾ ನರಸಿಂಹನಾ ಎಂದು ಹಾಡುತ್ತಾ ಶ್ರೀಹರ್ಷ ಅವರು ಪ್ರತಿಯೊಬ್ಬ  ಪ್ರೇಕ್ಷಕನನ್ನು ಭಗವಂತನ ಧ್ಯಾನಾಸಕ್ತರನ್ನಾಗಿಸಿದ್ದು ಉತ್ಪ್ರೇಕ್ಷೆಯಂತು ಅಲ್ಲ.

ಇನ್ನಷ್ಟು ಬೇಕೇನ್ನ ಹೃದಯಕ್ಕೆ ರಾಮ, ರಾಮ ರಾಮ ರಾಮ ಎನ್ನಿರೋ, ಕೇವಲ “ಶ್ರೀ ರಾಮ ರಾಮ ರಾಮೇತಿ“ ಎಂಬ ವಿಷ್ಣುಸಹಸ್ರನಾಮದ ಒಂದು ಶ್ಲೋಕ  ಹೇಳುವುದರಿಂದ ಸಹಸ್ರನಾಮ ಪಾರಾಯಣ ಹೇಗೆ ಸಾಧ್ಯ ಎಂಬುದರ ವಿಶ್ಲೇಷಣೆ, ಪ್ರೇಕ್ಷಕರ ಅಪೇಕ್ಷೆಯ ಮೇರೆಗೆ ರೋರಿಂಗ್ ರಾಮ ಹಾಡಿದ ಮೇಲಂತೂ ಅಂದಿನ ಸಭಾಂಗಣವಂತೂ ಸಕಲಂ ರಾಮಮಯ ಈ ಜಗಮಖಿಲಂ ರಾಮಮಯ  ಅನಿಸಿ ಸಭಾಂಗಣದಲ್ಲಿ ಅಖಂಡ ರಾಮ ಭಜನೆ ನಡೆಯುತ್ತಿದಿಯೇನೋ ಎಂದು ಭಾಸವಾಗಿದ್ದಂತೂ ಸತ್ಯ. 

ಕಡೆಯದಾಗಿ ಕೃಷ್ಣಾ ಎನಬಾರದೇ, ಭಾಗ್ಯದ ಲಕ್ಷ್ಮೀ ಬಾರಮ್ಮ, ಶರಣಂ ಅಯ್ಯಪ್ಪ ಸ್ವಾಮಿ ಶರಣಂ ಅಯ್ಯಪ್ಪ  ಎಂದು ಮಂಗಳ ಹಾಡಿದರು .

ಹೀಗೆ ಸತತ ಮೂರೂವರೆ ಘಂಟೆಗಳ ಶ್ರದ್ಧಾ ಭಕ್ತಿಯಿಂದ, ಸುಶ್ರಾವ್ಯವಾಗಿ, ಸುಮಧುರವಾಗಿ ಹಾಡಿದ ಶ್ರೀಹರ್ಷ ಅವರು ಪ್ರತಿಯೊಬ್ಬ ಪ್ರೇಕ್ಷಕನನ್ನು ಭಗವಂತನ ಕೃಪಾಕಟಾಕ್ಷಕ್ಕೆ. ಪಾತ್ರರನ್ನಾಗಿಸಿದ್ದಂತು ಸತ್ಯ.

ಶ್ರೀಯುತ ಕೆ.ಪಿ ಶಿವಾನಂದ್ ಅವರು ವೇದಿಕೆಗೆ ಆಗಮಿಸಿ, ತಮ್ಮ ಕಂಠಸಿರಿಯಿಂದ ಸಭಿಕರನ್ನು ಗಾಂಧರ್ವ ಲೋಕಕ್ಕೆ ಕರೆದೊಯ್ದ ಶ್ರೀ   ಶ್ರೀಹರ್ಷ ಮತ್ತು ವೃಂದದವರಿಗೆ, ಸಹಾಯ ಮಾಡಿದವರಿಗೆ, ಸಭಿಕರಿಗೆ ಮತ್ತು ಸ್ವಯಂಸೇವಕರಿಗೆ ವಂದನೆಗಳನ್ನು ಸಲ್ಲಿಸಿ ಕಾರ್ಯಕ್ರಮಕ್ಕೆ ಮುಕ್ತಾಯ ಹಾಡಿದರು.

ಒಟ್ಟಿನಲ್ಲಿ ಓಂಕಾರ ಸಮಿತಿಯು ಆಯೋಜಿಸಿರುವ ಉತ್ತಮೋತ್ತಮ ಕಾರ್ಯಕ್ರಮಗಳಲ್ಲಿ ಶ್ರೀ ಶ್ರೀಹರ್ಷ ಮತ್ತು ತಂಡದವರಿಂದ ಸಾಕಾರಗೊಂಡ ಓಂಕಾರ ನಾದಾಮೃತ -೨೦೨೩ ನಿಸ್ಸಂದೇಹವಾಗಿ ಅತ್ತ್ಯುತ್ತಮ ಕಾರ್ಯಕ್ರಮ ಎಂಬುದು ಪ್ರೇಕ್ಷಕರ ಅಭಿಪ್ರಾಯವಾಗಿತ್ತು.

ವರದಿ: ಶ್ರೀಮತಿ ಶ್ರೀಮಾತ ಹಿರಿಯಣ್ಣ 

ಓಂಕಾರ ದಶಮಾನೋತ್ಸವ

ಓಂಕಾರ ದಶಮಾನೋತ್ಸವ -2021

ಓಂಕಾರ ಗಣವಂದ್ಯಾಯ ಜ್ಞಾನಾನಂದೈಕ ಮೂರ್ತಯೇ |

ಸುಗುಣೇಂದ್ರನುತಾಯ ಶ್ರೀ ಕಪೀಂದ್ರಾಯ ನಮೋ ನಮಃ ||

ಕೆಲವು ಕ್ರಿಯಾಶೀಲ ಉತ್ಸಾಹಭರಿತ ಸಮಾನ ಚಿಂತಕರು ಸೇರಿ ಓಮಾನ್ ನಲ್ಲಿರುವ ಕನ್ನಡಿಗರಿಗಾಗಿ ಉತ್ತಮ ಧಾರ್ಮಿಕ ಸಾಂಸ್ಕ್ರತಿಕ ಹಾಗೂ ಆಧ್ಯಾತ್ಮಿಕ ಕಾರ್ಯಗಳನ್ನು ನೀಡಬೇಕೆಂಬ ಉತ್ತಮ ಉದ್ದೇಶದಿಂದ 2012 ರಲ್ಲಿ ಆರಂಭವಾದದ್ದು ಓಂಕಾರ ಸಮಿತಿ. ಅದಕ್ಕನುಗುಣವಾಗಿ ಆಗಿನಿಂದ ಇಲ್ಲಿಯವರೆಗೂ ಪ್ರತಿ ವರ್ಷ ಸಮಿತಿಯ ಆರಾಧ್ಯ ದೈವ ಶ್ರೀ ಓಂಕಾರ ಆಂಜನೇಯನ ಭಕ್ತಿ ಪೂರ್ಣ  ಪೂಜೆ, ಜ್ಞಾನ ಪೂರ್ಣ ಓಂಕಾರ ಜ್ಞಾನಾಮೃತ, ನಾದಮಯ ಓಂಕಾರ ನಾದಾಮೃತ ಕಾರ್ಯಕ್ರಮಗಳನ್ನು ಯಶಸ್ವಿಯಾಗಿ ನಡೆಸುತ್ತಾ ಬಂದು ಎಲ್ಲರ ಅಭಿಮಾನಕ್ಕೆ ಪಾತ್ರವಾಗಿದೆ.

ಕರೋನಾ ಹೆಮ್ಮಾರಿಯ ಧಾಳಿಗೆ ಸಿಲುಕಿ ವಿಶ್ವವೇ ನಲುಗಿದ ಈ ಎರಡು ವರ್ಷಗಳಲ್ಲಿ ಕೂಡ ಕಲಾಭಿಮಾನಿಗಳಿಗೆ ನಿರಾಸೆಯಾಗದಂತೆ ಆದರೆ ಕರೋನಾ ನಿರ್ಬಂಧಗಳನ್ನೂ ಮೀರದಂತೆ ಸಾಮಾಜಿಕ ತಾಣಗಳ ಮೂಲಕ ಯಶಸ್ವಿಯಾಗಿ ಕಾರ್ಯಕ್ರಮಗಳನ್ನು ಆಯೋಜಿಸಿದ ಹಿರಿಮೆ ಓಂಕಾರ ಸಮಿತಿಯದು.

ಈ ಬಾರಿ ಓಂಕಾರ ಸಮಿತಿಗೆ ದಶಮಾನೋತ್ಸವದ ವಿಶೇಷ ಸಂಭ್ರಮ. ಈ ಬಾರಿ ದಶಮಾನೋತ್ಸವಕ್ಕಾಗಿ ವಿಶೇಷ ಕಾರ್ಯಕ್ರಮಗಳನ್ನು ಮಾಡಬೇಕೆಂದು ನಿರ್ಧರಿಸಿ, ಓಂಕಾರ ಸಮಿತಿಯು ಶ್ರೀ ಓಂಕಾರ ಆಂಜನೇಯನ ಪೂಜೆ, ದಶಕ ನಡೆದು ಬಂದ ದಾರಿಯ ಓಂಕಾರ ಸಿಂಹಾವಲೋಕನ, ಓಂಕಾರ ಜ್ಞಾನಾಮೃತದ ಅಂಗವಾಗಿ ಹರಿಕಥೆ ಕಾರ್ಯಕ್ರಮ ಮತ್ತು ಓಂಕಾರ ನಾದಾಮೃತಕ್ಕಾಗಿ ಭಕ್ತಿ ಸಂಗೀತ ಮತ್ತು ಓಂಕಾರ ಸಂವಾದ ಕಾರ್ಯಕ್ರಮಗಳನ್ನು ಆಯೋಜಿಸಿ, ಡಿಸೆಂಬರ್ ೧೭ ಮತ್ತು ೧೮ರಂದು ಎರಡು ದಿನಗಳ ಕಾಲ ಸಾಮಾಜಿಕ ತಾಣಗಳಾದ ಓಂಕಾರ ಸಮಿತಿಯ ಫೇಸ್‌ಬುಕ್‌ ಮತ್ತು ಯೂಟ್ಯೂಬ್ ನಲ್ಲಿ ಲೈವ್ ಮೂಲಕ ಪ್ರಸಾರ ಮಾಡಲಾಯಿತು. 

ಕರೋನಾ ನಿರ್ಬಂಧಗಳು ಇನ್ನೂ ಇರುವುದರಿಂದ ಅವುಗಳಿಗನುಗುಣವಾಗಿ ಈ ಬಾರಿಯೂ ಸಾಮಾಜಿಕ ತಾಣಗಳ ಮೂಲಕವೇ ಕಾರ್ಯಕ್ರಮಗಳನ್ನು ನಡೆಸಲು ಮುಂಚೆಯೇ ನಿರ್ಧರಿಸಲಾಗಿತ್ತು ಮತ್ತು ಈ ಎಲ್ಲ ಕಾರ್ಯಕ್ರಮಗಳ ಪೂರ್ವಭಾವಿ ತಯಾರಿಗಳನ್ನು ಬಹಳ ವ್ಯವಸ್ಥಿತವಾಗಿ ಮಾಡಲಾಯಿತು.

ಮೊದಲನೆಯ ದಿನ 

ಶುಕ್ರವಾರ ಡಿಸೆಂಬರ್ ೧೭ರಂದು ಓಂಕಾರ ಆಂಜನೇಯ ಪೂಜೆ, ಓಂಕಾರ ಸಿಂಹಾವಲೋಕನ ಮತ್ತು ಹರಿಕಥೆ ಕಾರ್ಯಕ್ರಮಗಳನ್ನು ಓಂಕಾರ ಸಮಿತಿಯ ಚಾನೆಲ್ ಲೈವ್ ಗಳಲ್ಲಿ ಬಿತ್ತರಿಸಲಾಯಿತು. 

Click here for Day-1 Complete Video

ಅದರಂತೆ ಮೊದಲು ಒಂದು ಶುಭದಿನ ಅತ್ಯಂತ ಸರಳವಾಗಿ ಯಾವುದೇ ವಿಜೃಂಭಣೆ ಇಲ್ಲದೇ ಸರಳವಾಗಿ ಆದರೆ ಅತ್ಯಂತ ಭಕ್ತಿ ಶ್ರದ್ಧೆಗಳಿಂದ ಆಚರಣೆಗಳಿಗೆ ಚ್ಯುತಿ ಇಲ್ಲದಂತೆ ಪ್ರತಿಬಾರಿಯಂತೆ ಸಂಪ್ರದಾಯ ಬದ್ಧವಾಗಿ ಶ್ರೀ ಓಂಕಾರ ಆಂಜನೇಯನ ವಾರ್ಷಿಕ ಪೂಜೆ ನಡೆಸಿತು.

ದಶಮಾನೋತ್ಸವದ ಸಂದರ್ಭದಲ್ಲಿ ಶ್ರೀ ಓಂಕಾರ ಆಂಜನೇಯ ಸ್ವಾಮಿಗಾಗಿ ಶತಾವಧಾನಿ ಶ್ರೀಯುತ ಡಾ ಆರ್ ಗಣೇಶ್ ಅವರಿಂದ ರಚಿಸಲ್ಪಟ್ಟ ಈ ಕೆಳಗಿನ ಶ್ಲೋಕವನ್ನು ಆಂಜನೇಯ ಸ್ವಾಮಿಗೆ ಸಮರ್ಪಿಸಲಾಯಿತು.

 || ಓಂಕಾರ ಗಣವಂದ್ಯಾಯ ಜ್ಞಾನಾನಂದೈಕ ಮೂರ್ತಯೇ |
ಸುಗುಣೇಂದ್ರನುತಾಯ ಶ್ರೀ ಕಪಿಂದ್ರಾದ್ರಾಯ ನಮೋ ನಮಃ ||  

ಓಂಕಾರ ಸಿಂಹಾವಲೋಕನ

ಓಂಕಾರ ಸಮಿತಿಯು ದಶಮಾನೋತ್ಸವದ ಪ್ರಯುಕ್ತ ದಶಮಾನ ಕಾಲ ಓಂಕಾರ ಸಮಿತಿಯು ನಡೆದು ಬಂದ ದಾರಿಯ ಮಾಹಿತಿ ನೀಡುವ  ಪ್ರಯುಕ್ತವಾಗಿ ಓಂಕಾರ ಸಿಂಹಾವಲೋಕನ ಎಂಬ ಕಿರುಚಿತ್ರವನ್ನು ನಿರ್ಮಿಸಿದ್ದರು. ಈ ಕಿರುಚಿತ್ರವನ್ನು ಬೆಂಗಳೂರಿನ ಶ್ರೀ ಸೌರಭ ಕುಲಕರ್ಣಿ ಮತ್ತು ಕುಮಾರಿ ನಮಿತಾ ರವರು ನಿರೂಪಿಸಿ ತಯಾರಿಸಿದ್ದರು. ಓಂಕಾರ ಸಿಂಹಾವಲೋಕನ ಕಿರುಚಿತ್ರ ಓಂಕಾರ ಸಮಿತಿ ಇಲ್ಲಿಯವರೆಗೆ ನಡೆಸಿಕೊಂಡು ಬಂದ ಕಾರ್ಯಕ್ರಮಗಳು ಮತ್ತು ಅವುಗಳ ನಿರ್ವಹಣೆಯ ಮಾಹಿತಿಯನ್ನು ಎಳೆ - ಎಳೆಯಾಗಿ ಬಿಚ್ಚಿಟ್ಟರು. 

Click here Omkar Simahavalokana

ಸುಂದರ ನಿರೂಪಣೆಯೊಂದಿಗೆ ಓಂಕಾರ ಸಮಿತಿಯ ಕಾರ್ಯಕ್ರಮದಲ್ಲಿ ಅತಿಥಿಗಳಾಗಿ ಭಾಗವಹಿಸಿದ ಎಲ್ಲ ಮಹನೀಯರ ಓಂಕಾರ ಸಮಿತಿಯ ಬಗ್ಗೆ ಮಾತನಾಡಿದ ಮನದಾಳದ ಮಾತುಗಳು ಮತ್ತು ಶುಭಾಶಯಗಳು ವಿಶಿಷ್ಟವಾಗಿತ್ತು.

Click here for Omkar Guests Wishes 

ಹರಿಕಥೆ - ಸುಂದರಕಾಂಡ ಆಧಾರಿತ ಹನುಮದ್-ಭಕ್ತಿ 

ಈ ಬಾರಿಯ ಜ್ಞಾನಾಮೃತ ಕಾರ್ಯಕ್ರಮದ ಅಂಗವಾಗಿ ಹರಿಕಥೆ ಕಾರ್ಯಕ್ರಮವನ್ನು ನಡೆಸಿಕೊಟ್ಟವರು ಮಂಗಳೂರಿನ ಹರಿಕಥಾ ವಿದ್ವಾನ್ ಶ್ರೀ ಡಾ. ಎಸ್ ಪಿ ಗುರುದಾಸ್ ರವರು. ನಶಿಸಿ ಹೋಗುತ್ತಿರುವ ಅದ್ಭುತ ಕಲಾಪ್ರಾಕಾರ ಹರಿಕಥಾ ಕಾಲಕ್ಷೇಪ. ಈ ಕಲೆಗೆ ಉತ್ತೇಜನ ನೀಡುವ ಉದ್ದೇಶದಿಂದಲೇ ಈ ಬಾರಿ ಹರಿಕಥೆಯನ್ನು ಹಮ್ಮಿಕೊಳ್ಳಲಾಗಿತ್ತು. ಶ್ರೀಯುತ ಡಾ ಎಸ್ ಪಿ ಗುರುದಾಸ ಅವರು ಸುಂದರಕಾಂಡ ಆಧಾರಿತ ಹನುಮದ್-ಭಕ್ತಿ ಎಂಬ ಹರಿಕಥೆಯನ್ನು ಸಾಂಪ್ರದಾಯಿಕ ಪದ್ಧತಿಯಲ್ಲಿ ಎಲ್ಲರ ಮನಮುಟ್ಟುವಂತೆ ನಿರೂಪಿಸಿ ಮಸ್ಕತ್ ಕನ್ನಡಿಗರನ್ನೆಲ್ಲ ಆಂಜನೇಯನ ಭಕ್ತಿಯ ಪರಾಕಾಷ್ಠೆಯಲ್ಲಿ ಮುಳುಗಿಸಿದರೆಂದರೆ ತಪ್ಪಾಗಲಾರದು. ಶ್ರೀ ಗುರುದಾಸ್ ಅವರಿಗೆ ಹಿಮ್ಮೇಳ ಸಹಕಾರವನ್ನು  ಶ್ರೀ ರಮೇಶ್ ಹೆಬ್ಬಾರ್, ಶ್ರೀ ಸುಮನ್ ದೇವಾಡಿಗ, ಶ್ರೀ ಆತ್ರೇಯ ಗಂಗಾಧರ್ ಮತ್ತು ಶ್ರೀ ಸತೀಶ್ ಕಾಮತ್ ರವರು ಅಷ್ಟೇ ಅದ್ಭುತವಾಗಿ ನೀಡಿದರು.

Click Here for Harikathe by 

Sri Dr Gurudas Shivapura

ಶ್ರೀಮತಿ ಕವಿತಾ ರಾಮಕೃಷ್ಣ ಮತ್ತು ಶ್ರೀಮತಿ ವೀಣಾ ಶ್ರೀನಿವಾಸ ಅವರು ದಶಮಾನೋತ್ಸವದ ವಿವರಣೆ, ಕಲಾವಿದರ ಪರಿಚಯ ಹಾಗೂ ಸುಂದರವಾದ ನಿರೂಪಣೆಯೊಂದಿಗೆ ಮೊದಲನೆಯ ದಿನದ ಕಾರ್ಯಕ್ರಮವನ್ನು ಅಚ್ಚುಕಟ್ಟಾಗಿ ನಡೆಸಿಕೊಟ್ಟರು.

ಎರಡನೆಯ ದಿನ 

ಶನಿವಾರ ಡಿಸೆಂಬರ್ ೧೮ರಂದು ಓಂಕಾರ ಜ್ಞಾನಾಮೃತ ಹಾಗೂ ಓಂಕಾರ ಸಂವಾದ ಕಾರ್ಯಕ್ರಮಗಳನ್ನು ಓಂಕಾರ ಸಮಿತಿಯ ಚಾನೆಲ್ ಲೈವ್ ಗಳಲ್ಲಿ ಬಿತ್ತರಿಸಲಾಯಿತು. 

Click here for Day-2 Complete Video

ಓಂಕಾರ ನಾದಾಮೃತ

ಈ ವರ್ಷದ ಓಂಕಾರ ನಾದಾಮೃತ ಕಾರ್ಯಕ್ರಮದ ಈ ಬಾರಿಯ ಅತಿಥಿಗಳು ಮೈಸೂರಿನ ಜನಪ್ರಿಯ ಗಾಯಕ ಶ್ರೀ ಶ್ರೀಹರ್ಷರವರು ನಡೆಸಿಕೊಟ್ಟರು‌. ಶ್ರೀಹರ್ಷ ಅವರು ರಂಗಗೀತೆ, ದಾಸರ ಪದಗಳು, ಶರೀಫರ ತತ್ವಪದ, ತೆಲುಗು ಭಕ್ತಿಗೀತೆಗಳನ್ನೊಳಗೊಂಡ ಅಮೋಘ ಗಾಯನ ಮತ್ತು ವಿಭಿನ್ನವಾದ ಹಾಡುಗಳ ನಿರೂಪಣೆ ಸಂಗೀತದ ರಸಿಕರಿಗೆ ರಸದೌತಣ ನೀಡಿ ಸಂಗೀತ ಸುಧೆಯಲ್ಲಿ ಎಲ್ಲರನ್ನೂ ಮೀಯಿಸಿತು.  ಶ್ರೀಹರ್ಷ ಅವರ ಸಂಗೀತ ಎಲ್ಲಾ ಪ್ರೇಕ್ಷಕರನ್ನು ಮಂತ್ರಮುಗ್ದರನ್ನಾಗಿಸಿ ಮಸ್ಕತ್ ನ ಸಭಾಂಗಣದಲ್ಲಿಯೇ ಕಾರ್ಯಕ್ರಮ ನಡೆಸಿಕೊಡುವಂತೆ ಕೇಳಿಕೊಳ್ಳುವ ಸಂದೇಶಗಳು ಹರಿಯುತ್ತಿದ್ದವು. 

Click here for Omkar Naadamrutha by 
Sri Shriharsha 

ಓಂಕಾರ ಸಂವಾದ

ಓಂಕಾರ ಜ್ಞಾನಾಮೃತ ಕಾರ್ಯಕ್ರಮದ ನಂತರ ಓಂಕಾರ ಸಮಿತಿಯ ನೇರವಾಗಿ ನಡೆದ ಓಂಕಾರ ಸಂವಾದ ಕಾರ್ಯಕ್ರಮದಲ್ಲಿ ವಿಶ್ವದ ಬೇರೆ ಬೇರೆ ಸ್ಥಳಗಳಿಂದ ಓಂಕಾರ ಸಮಿತಿಯ ರೂವಾರಿಗಳು , ಸದಸ್ಯರು , ಕಾರ್ಯಕರ್ತರು ಸಮಿತಿಯೊಂದಿಗಿನ ತಮ್ಮ ತಮ್ಮ  ಒಡನಾಟಗಳನ್ನು ಅನುಭವವನ್ನು ಎರಡು ಘಂಟೆಗಳ ಕಾಲ ಹಂಚಿಕೊಂಡು ತಮ್ಮ ಹರ್ಷ ವ್ಯಕ್ತಪಡಿಸಿದರು. 

Click here for Omkar Samvaada 

ಶ್ರೀಮತಿ ಗಿರಿಜಾ ರವಿಕುಮಾರ ಮತ್ತು ಶ್ರೀಮತಿ ಶ್ರೀಮಾತಾ ಹಿರಿಯಣ್ಣ ಅವರು ಜ್ಞಾನಾಮೃತದ ವಿವರಣೆ, ಕಲಾವಿದರ ಪರಿಚಯ ಹಾಗೂ  ಸುಂದರವಾದ ನಿರೂಪಣೆಯೊಂದಿಗೆ ಎರಡನೇಯ ದಿನದ ಕಾರ್ಯಕ್ರಮವನ್ನು ಅಚ್ಚುಕಟ್ಟಾಗಿ  ನಡೆಸಿಕೊಟ್ಟರು. 

ಒಟ್ಟಿನಲ್ಲಿ ಓಂಕಾರ ಸಮಿತಿಯ ದಶಮಾನೋತ್ಸವ  ವರ್ಷದ ವಿಶೇಷ ಕಾರ್ಯಕ್ರಮಗಳು ನಿರ್ಬಂಧಗಳ ನಡುವೆಯೂ  ಅವಿಸ್ಮರಣೀಯವಾಗಿ   ಅತ್ಯಂತ ಸಂಭ್ರಮದಿಂದ ಎರಡು ದಿನಗಳ ಕಾಲ ಯಶಸ್ವಿಯಾಗಿ ನೆರವೇರಿತು.

ವರದಿ : ಶ್ರೀಮತಿ ವೀಣಾ ಶ್ರೀನಿವಾಸ 

ಓಂಕಾರ ನಾದಾಮೃತ -೨೦೨೦

ಓಂಕಾರ ನಾದಾಮೃತ - ೨೦೨೦

ಮಸ್ಕತ್ತಿನ ಓಂಕಾರ ಸಮಿತಿಯು ಕಳೆದ ಕೆಲವು ವರ್ಷಗಳಿಂದ ಸದಭಿರುಚಿಯ ಓಂಕಾರ ಜ್ಞಾನಾಮೃತ ಮತ್ತು ಓಂಕಾರ ನಾದಾಮೃತ ಕಾರ್ಯಕ್ರಮಗಳನ್ನು ಪ್ರತೀ ವರ್ಷ ಯಶಸ್ವಿಯಾಗಿ ನಡೆಸಿಕೊಂಡು ಬರುತ್ತಿದೆ. ಭಾರತದ ಅತ್ಯಂತ ಉತ್ತಮ ವಾಗ್ಮಿಗಳು ಮತ್ತು ಸಂಗೀತ ವಿದ್ವಾಂಸರುಗಳು ಈ ಕಾರ್ಯಕ್ರಮಗಳನ್ನು ನಡೆಸಿಕೊಂಡು ಬರುತ್ತಿದ್ದಾರೆ. 

ವರ್ಷದ ಆರಂಭದಲ್ಲಿ ಕರೋನ ಮಹಾಮಾರಿಯ ಕಪಿಮುಷ್ಠಿಯಲ್ಲಿ ಪ್ರಪಂಚ ಸಿಲುಕಿ ಸಾಮಾಜಿಕ ಕಾರ್ಯಕ್ರಮಗಳನ್ನು ನಡೆಸಲು ನಿರ್ಬಂಧತೆ ಇದ್ದಾಗ ಓಂಕಾರ ಜ್ಞಾನಾಮೃತ ಕಾರ್ಯಕ್ರಮವನ್ನು ಅನಿವಾರ್ಯವಾಗಿ ರದ್ದು ಪಡಿಸಬೇಕಾಯಿತು. ಕಾಲಕಳೆದಂತೆ ಕಲೆ ಕಲಾಸಕ್ತರ ಕಲಾರಸಿಕರ ಬಳಿ ಬರುವುದಕ್ಕೆ ಅನೇಕ ದಾರಿಗಳನ್ನು ಕಂಡುಕೊಂಡಿತು. ಅದರಲ್ಲಿ ಒಂದು ಅಂತರ್ಜಾಲ ಉಪಯೋಗಿಸಿ ಮಾಡುವ ನೇರಪ್ರಸಾರ ಕಾರ್ಯಕ್ರಮಗಳು.

ಓಂಕಾರ ಸಮಿತಿಯು ಕೂಡ ಅದೇ ನಿಟ್ಟಿನಲ್ಲಿ ಹೆಜ್ಜೆ ಇಟ್ಟು ಓಂಕಾರ ನಾದಾಮೃತ - ೨೦೨೦ ಕಾರ್ಯಕ್ರಮವನ್ನು ಸಂಗೀತ ಅಭಿಮಾನಿಗಳಿಗೆ ತಲುಪಿಸುವ ಯೋಜನೆ ಹಮ್ಮಿಕೊಂಡಿತು. ಅದರಂತೆ ಈ ಕಾರ್ಯಕ್ರಮದ ರೂಪರೇಷೆಗಳನ್ನು ಸಿದ್ಧಪಡಿಸಲಾಯಿತು.

ಅದರ ಮೊದಲ ಹೆಜ್ಜೆಯಾಗಿ ಪ್ರಖ್ಯಾತ ಭಕ್ತಿ ಸಂಗೀತ ಗಾಯಕ ಯುವ ಕಲಾವಿದ ಶ್ರೀ ಅನಂತರಾಜ ಮಿಸ್ತ್ರಿ ಅವರನ್ನು ಈ ಬಗ್ಗೆ ಸಂಪರ್ಕಿಸಿದಾಗ ಅವರು ಸಹ ಸಂತೋಷದಿಂದ ಒಪ್ಪಿಕೊಂಡರು.

ಈಗ ಬೆಂಗಳೂರಿನಲ್ಲಿ ನೆಲೆಸಿರುವ ಓಂಕಾರ ಸಮಿತಿಯ ಸದಸ್ಯರಾದ ಶ್ರೀ ಯೋಗಾನಂದ, ಶ್ರೀರಾಮಚಂದ್ರ ರಾವ್, ಅನಿಲ್ ಕುಮಾರ  ಟಿ. ಡಿ.  ಮತ್ತು ಶ್ರೀ ಸುಧೀಂದ್ರ ಅವರ ಸಹಕಾರದಿಂದ ಕಲಾವಿದ ಶ್ರೀ ಅನಂತರಾಜ ಮಿಸ್ತ್ರಿ ಯವರು ಪಕ್ಕವಾದ್ಯ ಕಲಾವಿದರೊಡನೆ ಪ್ರಯೋಗ್ ಸ್ಟುಡಿಯೋಗೆ ಹೋಗಿ ಅಲ್ಲಿ ಸಂಪೂರ್ಣ ಸಂಪೂರ್ಣ ಕಾರ್ಯಕ್ರಮವನ್ನು ನಡೆಸಿ ಅದರ ಧ್ವನಿಮುದ್ರಣವನ್ನು ಮಸ್ತ್ಕತ್ತಿಗೆ ಕಳಿಸಿಕೊಟ್ಟರು.

ಓಂಕಾರ ಸಮಿತಿಯ ಸದಸ್ಯರಾದ ಶ್ರೀ ಮಹೇಶ್ ಪುರೋಹಿತ್ ರವರು ಅದನ್ನು ಇಲ್ಲಿ ಸಂಕಲನ ಮಾಡಿ ನೇರಪ್ರಸಾರಕ್ಕೆ ಸಿದ್ಧಪಡಿಸಿದರು. ಹೀಗೆ ಒಂದು ಸುಂದರ ಸಂಗೀತ ಕಾರ್ಯಕ್ರಮ ಸಿದ್ಧವಾಯಿತು. ಬರಿಯ ಮಸ್ಕತ್ ಮಾತ್ರವೇ ಅಲ್ಲದೆ ಪ್ರಪಂಚದ ಎಲ್ಲೆಡೆಯೂ ಇರುವ ಸಂಗೀತಾಸಕ್ತರನ್ನು ಕೂಡ ತಲುಪಲು ಸಾಧ್ಯವಾಯಿತು.

ಇದೇ ಸೆಪ್ಟೆಂಬರ್ 25 ನೇ ತಾರೀಖು,  ಶುಕ್ರವಾರ ಸಂಜೆ ಓಮಾನ್ ಸಮಯ 6:00 ಮತ್ತು ಭಾರತೀಯ ಕಾಲಮಾನ 7.30 ಗೆ ಸರಿಯಾಗಿ ಯೂಟ್ಯೂಬ್ ಮತ್ತು ಫೇಸ್ಬುಕ್ನಲ್ಲಿ ಈ ಕಾರ್ಯಕ್ರಮವನ್ನು ನೇರವಾಗಿ ಪ್ರಸಾರ ಮಾಡಲಾಯಿತು.

ಮೊದಲು ಅಂದು ನಿಧನರಾದ ಪ್ರಖ್ಯಾತ ಗಾಯಕ ಶ್ರೀ ಎಸ್ ಪಿ ಬಾಲಸುಬ್ರಹ್ಮಣ್ಯಂ ಅವರಿಗೆ ಶ್ರದ್ಧಾಂಜಲಿ ಸಲ್ಲಿಸಲಾಯಿತು.

ನಂತರ ಓಂಕಾರ ಸಮಿತಿಯ ಸದಸ್ಯ ಶ್ರೀ ರವಿಕುಮಾರ್ ರವರ ಸ್ವಾಗತ ಭಾಷಣದಿಂದ ಕಾರ್ಯಕ್ರಮ ಆರಂಭವಾಯಿತು. ಅವರು ತಮ್ಮ ಕಿರು ಭಾಷಣದಲ್ಲಿ ನೇರ ಪ್ರಸಾರ ಕಾರ್ಯಕ್ರಮದ ಹಿನ್ನೆಲೆ,  ಯೋಜನೆ ಮತ್ತು ಕಾರ್ಯರೂಪಕ್ಕೆ ತಂದ ಬಗೆಗೆ ಹೇಳಿದರು. 

ನಂತರ ಶ್ರೀಮತಿ ವೀಣಾ ಶ್ರೀನಿವಾಸ್ ರವರು ಕಲಾವಿದರ ಕಿರುಪರಿಚಯ ಮತ್ತು ಕಾರ್ಯಕ್ರಮದ ನಿರೂಪಣೆ ಮಾಡಿಕೊಟ್ಟರು. 

ಪರಿಚಯದ ನಂತರ ಓಂಕಾರ ಸಮಿತಿಯ ಆರಾಧ್ಯದೈವ ಆಂಜನೇಯನನ್ನು ಸ್ಮರಿಸಿ ಸಂಗೀತ ಕಾರ್ಯಕ್ರಮ ಆರಂಭವಾಯಿತು.

ಶ್ರೀ ಅನಂತರಾಜ್ ಮಿಸ್ತ್ರಿ ಅವರ ಭಕ್ತಿ ರಸಪೂರ್ಣ ಸಂಗೀತ ಕಾರ್ಯಕ್ರಮಕ್ಕೆ ಪಕ್ಕವಾದ್ಯದಲ್ಲಿ ಪ್ರತಿಭಾನ್ವಿತ ಕಲಾವಿದರುಗಳಾದ ಶ್ರೀ ಭರತ್ ಆತ್ರೇಯಸ್ ರವರು ಕೊಳಲಿನಲ್ಲಿ , ಶ್ರೀ ಎಂ ಸಿ ಶ್ರೀನಿವಾಸ್ ರವರು ರಿದಮ್ ಪ್ಯಾಡಿನಲ್ಲಿ , ಶ್ರೀ ವಿಕಾಸ್ ನರೇಗಲ್ ರವರು ತಬಲದಲ್ಲಿ,  ಶ್ರೀ ಆಕಾಶ್ ಪರ್ವರವರು ಕೀಬೋರ್ಡಿನಲ್ಲಿ ಮತ್ತು ಶ್ರೀ ಸಂಜೀವ ಕುಲಕರ್ಣಿಯವರು ತಾಳದಲ್ಲಿ ಸಾಥ್ ನೀಡಿದರು.

ಕಲಾವಿದ ಶ್ರೀ ಅನಂತರಾಜ್ ಮಿಸ್ತ್ರಿ ಅವರು ಮೊದಲಿಗೆ ಶ್ರೀ ರಮಾಕಾಂತ ವಿಠಲ ದಾಸರ ಚಿಪ್ಪಗಿರಿ ನಿಲಯ ಕೃತಿಯಿಂದ ಭಕ್ತಿಪೂರ್ಣ ಕಾರ್ಯಕ್ರಮವನ್ನು ಆರಂಭಿಸಿ ಎಲ್ಲ ಶ್ರೋತೃಗಳ ಮನದಲ್ಲಿ ಭಕ್ತಿಭಾವ ಬಿತ್ತಿದರು. ನಂತರ ಶ್ರೀ ಜಗನ್ನಾಥದಾಸರ ರೋಗಹರನೇ ಕೃಪಾಸಾಗರ ಕೃತಿಯ ಮೂಲಕ ಶ್ರೀ ಗುರು ರಾಯರನ್ನು ಈ ಕರೋನಾ ಮಾರಿಯಿಂದ ರಕ್ಷಿಸು ಎಂದು ಪ್ರಾರ್ಥಿಸಿಕೊಂಡರು.

ನಂತರದ ಶ್ರೀ ಶ್ರೀಪಾದರಾಯರ ಮೊದಲೊಂದಿಪೆ ನಿನಗೆ ಗಣನಾಥ ಕೃತಿಯಿಂದ ವಿಘ್ನೇಶ್ವರನನ್ನು ಪ್ರಾರ್ಥಿಸಿದರು. ಮುಂದೆ ಶ್ರೀಪುರಂದರದಾಸರ ಗೆದ್ದೆಯೋ ಹನುಮಂತ,  ಪ್ರಾಣೇಶ ವಿಠ್ಠಲ ರಾಯರ ಪವನ ಸಂಭೂತ ಕೃತಿಗಳು ಹನುಮಂತನನ್ನು ಕಣ್ಣಮುಂದೆ ತಂದು ನಿಲ್ಲಿಸಿದವು.

ನಂತರದ ಪ್ರಸ್ತುತಿ ಶ್ರೀ ಶೇಷ ವಿಠಲ ದಾಸರ ರಮಾಸಮುದ್ರನ ಕುಮಾರಿ,  ಶ್ರೀ ಪುರಂದರದಾಸರ ಬಾರಯ್ಯ ಮನೆಗೆ ಭರತಾಗ್ರಜ ಕೃತಿಗಳು ಶ್ರೋತೃಗಳನ್ನು   ಭಕ್ತಿರಸದಲ್ಲಿ ಮುಳುಗಿಸಿದವು. ಅವರ ಮುಂದಿನ ಕೃತಿ  ಈ ಸಂಕಷ್ಟ ಕಾಲದಲ್ಲಿ  ಸಮಾಧಾನಿಸುವಂಥ ಸಾವಧಾನದಿಂದಿರು ಮನವೇ ಶ್ರೋತೃಗಳ ಅಂತರಂಗ ಮುಟ್ಟಿತು.

ಮುಂದಿನದು ಹರಿನಾಮದ ಬಲವನ್ನು ಹೇಳುವ ಶ್ರೀಪುರಂದರದಾಸರ ಕಲಿಯುಗದಲ್ಲಿ ಹರಿನಾಮವ ನೆನೆದರೆ  ಕೃತಿ ಶ್ರೀ ಅನಂತರಾಜ್ ಮಿಸ್ತ್ರಿ ಯವರನ್ನು ಜನಪ್ರಿಯಗೊಳಿಸಿ ಅವರನ್ನು ಮನೆಮಾತಾಗಿಸಿದ ಅವರ ಪ್ರಖ್ಯಾತಗೀತೆ ಶ್ರೀ ವಾದಿರಾಜ ವಿರಚಿತ ಆವಕುಲವೋ ರಂಗ ಕೃತಿಯನ್ನು ಹಾಡಿ ಕೇಳುಗರ ಮನ ರಂಜಿಸಿದರು.

ನಂತರದಲ್ಲಿ ಅವರು ಪ್ರಸ್ತುತಪಡಿಸಿದ ಶ್ರೀಪುರಂದರದಾಸರ ಹೂವ ತರುವರ ಮನೆಗೆ ಹುಲ್ಲ ತರುವ , ಶ್ರೀ ಪ್ರಸನ್ನ ವೆಂಕಟದಾಸರ ದಡ ಸೇರಿಸೋ ಭವದ ಗೀತೆಗಳು ಎಲ್ಲರ ಮನ ಗೆದ್ದವು. ಅವರು ಮುಂದಿನ ಕೃತಿ ಶ್ರೀ ಕನಕದಾಸರ ತೊರೆದು ಜೀವಿಸಬಹುದೇ ಕೃತಿ ಕೇಳುಗರನ್ನು ಭಕ್ತಿಯ ಪರಾಕಾಷ್ಠೆಗೆ ಕೊಂಡೊಯ್ದಿತು.

ಅವರ ಮುಂದಿನ‌ಪ್ರಸ್ತುತಿ ಶ್ರೀ ಶ್ರೀಪತಿ ವಿಠ್ಠಲ ದಾಸರ ಪಾಂಡುರಂಗ ತ್ವತ್ಪಾದ ಪಾಲಿಸಯ್ಯ ಮತ್ತು ಅಪರೂಪದ ರಚನೆಕಾರ ಪರಮ ವೈರಾಗ್ಯಶಾಲಿ ಶ್ರೀ ತಮ್ಮಣ್ಣ ದಾಸರ ಪರಿಪೂರ್ಣ ಪಾವನ ಗುಣ ಕೃತಿಗಳು ಕಲಾರಸಿಕರನ್ನು ಮೈಮರೆಯುವಂತೆ ಮಾಡಿದವು.

ಹೀಗೆ ಶ್ರೀ ಅನಂತರಾಜ ಮಿಸ್ತ್ರಿ ಯವರು ಅವರಷ್ಟೇ ಪ್ರತಿಭಾನ್ವಿತ ಯುವ ಪಕ್ಕವಾದ್ಯದವರೊಡನೆ ಶ್ರೋತೃಗಳನ್ನು ತಮ್ಮ ಮಾಂತ್ರಿಕ ಗಾನದಿಂದ  ಅದ್ಭುತ ನಾದಲೋಕಕ್ಕೆ  ಕೊಂಡೊಯ್ದು ನಾದದ ರಸದೌತಣವನ್ನೇ ಉಣಬಡಿಸಿದರು.

ಈ ಅದ್ಭುತ ಸುಂದರ ಸಂಗೀತ ಕಾರ್ಯಕ್ರಮದ ನಂತರ ಎಲ್ಲಾ ಕಲಾವಿದರನ್ನು ಬೆಂಗಳೂರಿನಲ್ಲಿ ನೆಲೆಸಿರುವ ಓಂಕಾರ ಸಮಿತಿಯ ಸದಸ್ಯರು ಶ್ರೀ ಯೋಗಾನಂದ, ಶ್ರೀರಾಮಚಂದ್ರ ರಾವ್  ಮತ್ತು ಶ್ರೀ ಸುಧೀಂದ್ರ  ಅವರು ಪರಿವಾರದೊಂದಿಗೆ ಸನ್ಮಾನಿಸಿದರು.

ನಂತರ ಶ್ರೀ ರವೀಂದ್ರ ಅವರು ವಂದನಾರ್ಪಣೆ ಮಾಡುವುದರ ಮೂಲಕ ಕಾರ್ಯಕ್ರಮ ಸಂಪನ್ನವಾಯಿತು.

ನೇರ ಸಂಗೀತ ಕಾರ್ಯಕ್ರಮ ಪ್ರಸಾರದ ಯೋಜನೆ ಯಶಸ್ವಿಯಾಗಿ ಮುಕ್ತಾಯವಾಯಿತು.

ಕಾರ್ಯಕ್ರಮದ ವಿಡಿಯೋ ಲಿಂಕ್:

ವರದಿ ಶ್ರೀಮತಿ ವೀಣಾ ಶ್ರೀನಿವಾಸ್

ಓಂಕಾರ ನಾದಾಮೃತ -೨೦೧೯

ಓಂಕಾರ ನಾದಾಮೃತ -೨೦೧೯

ದಿನಾಂಕ ೧೩-ಸೆಪ್ಟೆಂಬರ್-೨೦೧೯ ಶುಕ್ರವಾರದ ಶುಭಸಂಜೆ ೬:೩೦ ಘಂಟೆಗೆ ಅತ್ಯುತ್ತಮವಾದ ಹರಿನಾಮ ಸಂಕೀರ್ತನೆಗಳನ್ನು ಕೇಳಿ ಇಂದ್ರೀಯ ಮತ್ತು ಮನಸ್ಸುಗಳಿಗೆ ಆಹ್ಲಾದ ಹಾಗೂ ಪುಣ್ಯ ಸಂಪಾದನೆ ಮಾಡಿಕೊಳ್ಳಲು ಮಸ್ಕತ್ ನ ಸಂಗೀತಪ್ರಿಯರು ಭಗವದ್ ಭಕ್ತರು ಶ್ರೀಕೃಷ್ಣಮಂದಿರದ ಸಭಾಂಗಣದಲ್ಲಿ ಸೇರಿದ್ದರು.

ನಾಹಮ್ ಕರ್ತಾ ಹರಿಃ ಕರ್ತಾ ಎಂಬ ತತ್ವವನ್ನು ಪ್ರತಿಪಾದಿಸುವ ಓಂಕಾರ ಸಮಿತಿಯು ಭಕ್ತಿ, ಜ್ಞಾನ ಮತ್ತು ನಾದಭರಿತ ಕಾರ್ಯಕ್ರಮಗಳಲ್ಲಿ ಗಾಂಧರ್ವ ಗಾನದ ಮೂಲಕ ನಾದಾಮೃತವನ್ನು ಪಸರಿಸುತ್ತಿರುವ ಶ್ರೀ ಪುತ್ತೂರು ನರಸಿಂಹ ನಾಯಕ ಮತ್ತು ವೃಂದದವರು ಓಂಕಾರ ನಾದಾಮೃತ-೨೦೧೯ ಕಾರ್ಯಕ್ರಮಕ್ಕಾಗಿ ಬೆಂಗಳೂರಿನಿಂದ ಆಗಮಿಸಿದ್ದರು.

ಶ್ರೀ ರವಿಕುಮಾರ್ ಅವರು ತಮ್ಮ ಸ್ವಾಗತ ಭಾಷಣದೊಂದಿಗೆ  ಆಗಮಿಸಿದ ಮುಖ್ಯ ಅತಿಥಿಗಳನ್ನು ಹೂಗುಚ್ಚ ನೀಡಿ ವೇದಿಕೆಗೆ ಅಹ್ವಾನಿಸಿದರು ಹಾಗೂ ನೆರೆದಿದ್ದ ಸಭಿಕರಿಗೆ ಹೃತ್ಪೂರ್ವಕ ಸ್ವಾಗತವನ್ನು ಕೋರಿ, ಓಂಕಾರ ಸಮಿತಿಯ ಏಳು ವರ್ಷಗಳ ಸತತ ಸಾಧನೆಯ ಕಿರುನೋಟವನ್ನು ತಿಳಿಸಿಕೊಟ್ಟರು.

ಶ್ರೀ ಲಕ್ಷ್ಮೀನಾರಾಯಣ ಆಚಾರ್ಯರವರು ಅತಿ ಸುಂದರಕ್ಕೆ ಸುಂದರವಾದ ಭಗವಂತನ ಮಂದಸ್ಮಿಕ ರೂಪವನ್ನು ನಮ್ಮೆಲ್ಲರ ಹೃತ್ಕಮಲದಲ್ಲಿ ನೆಲೆಸುವಂತೆ ಬೇಡಿ, ಎಲ್ಲರ ಒಳಿತಿಗಾಗಿ ದೇವರಿಗೆ ಮಂಗಳಾರತಿಯ ಮೂಲಕ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು.

ನಂತರ ಶ್ರೀಮತಿ ಕವಿತಾ ರಾಮಕೃಷ್ಣ ಅವರಿಂದ ಗಾನಗಂಧರ್ವರಾದ ಶ್ರೀ ಪುತ್ತೂರು ನರಸಿಂಹ ನಾಯಕರವರ ಪರಿಚಯ ಹಾಗೆಯೇ ಸಂಗೀತದ ನಾಡಿಮಿಡಿತಗಳಾದ ಕೀಬೋರ್ಡ್ ಕಿಶನ್ ಎಂದೇ ಹೆಸರುವಾಸಿಯಾಗಿರುವ ಶ್ರೀ ಎನ್ ಆರ್ ಕೃಷ್ಣ ಉಡುಪ ಹಾಗೂ ತಬಲಾವಾದ್ಯ ನಿಪುಣ ಶ್ರೀ ರಘುನಾಥ್ ರಾಜುರವರ ಹಾಗೂ ಮಸ್ಕತ್ತಿನವರೇ ಆದ ತಾಳವಾದ್ಯ ಕಲಾವಿದ ಶ್ರೀ ವಿಶಾಲ್ ಪಡಿಯಾರ್ ಇವರೆಲ್ಲರ ಕಿರುಪರಿಚಯ ಮಾಡಿಸಿ ಕೊಟ್ಟರು.

೧೨೦೦೦ಕ್ಕೂ ಹೆಚ್ಚು ಹಾಡುಗಳನ್ನು ಹಾಡಿರುವ, ೫೦೦೦ಕ್ಕೂ ಹೆಚ್ಚು ಕಾರ್ಯಕ್ರಮಗಳನ್ನು ಸ್ವದೇಶದಲ್ಲಿ ಅಲ್ಲದೇ ವಿದೇಶಗಳಲ್ಲೂ ಹಾಡಿರುವ ವಿವಿಧ ಪುರಸ್ಕಾರಗಳ ನಾಯಕರಾದ ಶ್ರೀ ಪುತ್ತೂರು ನರಸಿಂಹ ನಾಯಕರವರು ತಮ್ಮ ತಂಡದೊಂದಿಗೆ ಮೂಷಕವಾಹನ ವಿಘ್ನವಿನಾಶಕ ಗಣೇಶನ ಪ್ರಾರ್ಥನೆಯೊಂದಿಗೆ ಕಾರ್ಯಕ್ರಮವನ್ನು ಅರಂಭಿಸಿದರು. ನಂತರ ಎಲ್ಲ ಜಾತಿ, ಮತ ಮತ್ತು ಪಂಥ ಒಂದೇ ಎಂದು ಸಾರುವ ಗುರುಗಳಾದ ಶ್ರೀ ನಾರಾಯಣ ಗುರುಗಳ ತುಳುಗೀತೆ ಹಾಡಿನೊಂದಿಗೆ ಗುರುಗಳ ಮಹತ್ವವನ್ನು ತಿಳಿಸಿಕೊಟ್ಟರು. ತನ್ನ ಮೋಹಕ ರೂಪದಿಂದ ಎಲ್ಲರನ್ನೂ ಸೆಳೆಯುತ್ತಿರುವ ಕೃಷ್ಣನ ಭಕ್ತರಾದ ಪುರಂದರದಾಸರು ಹಾಗೂ ವ್ಯಾಸರಾಜರ ಮಹತ್ವ ಮತ್ತು ಯಾರಿಗೆ ಯಾರು ಗುರು ಎಂದು ಹಾಡಿನಲ್ಲೇ ತೋರಿಸಿದರು. ಸ್ವಾಮಿನಿಷ್ಠೆಗೆ ಮತ್ತೊಂದು ಹೆಸರಾದ ಭಕ್ತಿಗೆ ಸಾಕರಮೂರ್ತಿಯಾದ ರಾಮದೂತ ನಮ್ಮ ಓಂಕಾರ ಸಮಿತಿಯ ಚಿಕ್ಕ ಹನುಮಂತನನ್ನು ತಮ್ಮ "ಇಕ್ಕೋ ನೋಡಿರೇ ಚಿಕ್ಕ ಹನುಮಂತ  " ಹಾಡಿನ ಮೂಲಕ ಹಾಡಿ ಹೊಗಳಿದರು.

ಸುಸ್ವರ ಸಂಗೀತದೊಂದಿಗೆ ವಿವರಗಳನ್ನು, ಹಾಡಿನ ವಿಶೇಷತೆಗಳನ್ನು ತಿಳಿಸಿಕೊಡುತ್ತಿದ್ದ ಶ್ರೀ ಪುತ್ತೂರು ನರಸಿಂಹ ನಾಯಕರು ಮತ್ತು ಅವರ ತಂಡದವರಿಗೆ ಕಾರ್ಯಕ್ರಮದ ಮಧ್ಯದಲ್ಲಿ ಗಣ್ಯವ್ಯಕ್ತಿಗಳಿಂದ ಸನ್ಮಾನ ಮಾಡಲಾಯಿತು. ನಂತರ ಮಸ್ಕತ್ತಿನ ಸ್ಥಳೀಯ ಸಂಘಟನೆಗಳಾದ ಬಸವ ಬಳಗ, ಜಿ. ಎಸ್. ಬಿ ಕುಟುಂಬದವರು ಹಾಗೂ ಭಾರತೀಯ ಸಾಮಾಜಿಕ ಒಕ್ಕೂಟ - ಕರ್ನಾಟಕ ವಿಭಾಗದವರಿಂದ ಸನ್ಮಾನಿಸಲ್ಪಟ್ಟರು.

ತದನಂತರ ಓಂಕಾರ ಸಮಿತಿಯ ಗಣ್ಯರು ಮತ್ತು ಸಮಿತಿಯ ಎಲ್ಲ ಸದಸ್ಯರಿಂದ ಸನ್ಮಾನದೊಂದಿಗೆ ನೆನಪಿನ ಕಾಣಿಕೆಗಳನ್ನು ಸಲ್ಲಿಸಿದರು.

ಕಲಾವಿದರ ಸನ್ಮಾನದ ನಂತರ ಓಂಕಾರ ಸಮಿತಿಯ ಸದಸ್ಯರಾದ ಡಾ. ಸಿ. ಕೆ. ಅಂಚನ್ ರವರು ಓಂಕಾರ ಸಮಿತಿಯ ಭಕ್ತಿಯ ಧ್ಯೋತಕದ ಕಾರ್ಯಕ್ರಮವಾದ ಈ ವರ್ಷದ ಶ್ರೀ ಆಂಜನೇಯ ಪೂಜೆಯ ಸಂದರ್ಭದಲ್ಲಿ ದಿನಾಂಕ ೧೩-ಡಿಸೆಂಬರ್-೨೦೧೯ ರಿಂದ ಒಂದು ವಾರದ ಕಾಲ ಪುತ್ತಿಗೆ ಮಠದ ಶ್ರೀ ಸುಗಣೇಂದ್ರ ತೀರ್ಥರ ಕಾರ್ಯಕ್ರಮದ ಯೋಜನೆ ಹಮ್ಮಿಕೊಂಡಿರುವ ಬಗ್ಗೆ ನೆರದ ಸಭಿಕರೆಲ್ಲರಿಗೂ ತಿಳಿಸಿದರು. ಮಸ್ಕತ್ ಸದ್ಭಕ್ತ ಕನ್ನಡಿಗರೆಲ್ಲರೂ ತನು, ಮನ, ಧನದೊಂದಿಗೆ ಓಂಕಾರ ಸಮಿತಿಯೊಂದಿಗೆ ಈ ಸುವರ್ಣ ಅವಕಾಶದಲ್ಲಿ ಭಾಗಿಯಾಗಲು ಕರೆಕೊಟ್ಟರು.

ಆ ನಂತರದಲ್ಲಿ ಪುರಂದರದಾಸರು, ಕನಕದಾಸರು, ಪ್ರಸನ್ನ ವೆಂಕಟದಾಸರು, ಅಭಿನವ ಜನಾರ್ಧನ ವಿಠ್ಠಲದಾಸರು, ವಾದಿರಾಜರ ಕೃತಿಗಳು, ವಚನಗಳು, ಕೊಂಕಣಿ ಮತ್ತು ತುಳು ಭಾಷೆಗಳ ರಚನೆಗಳು ಕರ್ನಾಟಕದ ಅಖಂಡತೆಯನ್ನು ಬಿಂಬಿಸುವಂತಿತ್ತು.

ದಶಾವತಾರ ವರ್ಣನೆ ಕೃತಿ ವಿವಿಧ ರಾಗಗಳಲ್ಲಿ ಜ್ಞಾನ, ಭಕ್ತಿ, ವೈರಾಗ್ಯವನ್ನು ದಯಪಾಲಿಸೆಂದ ಭಾಗ್ಯದ ಲಕ್ಷ್ಮಿಯನ್ನು ಬರುವಂತೆ ಬೇಡುವದು. ದೇವರು ಕೊಟ್ಟಾನು ಕೊಟ್ಟಾನು ಕೊಟ್ಟಾನು ಅಲ್ಲಿಯವರೆಗೆ ನಾವು ಹೇಗೆ ತಾಳ್ಮೆಯಿಂದಿರಬೇಕು ಎಂಬ ರಚನೆ. ಪವಮಾನ, ಏಸುಕಾಯಂಗಳ ಕಳೆದು, ತುಂಗಾತೀರದೀ ನಿಂತ ಸುಯತಿವರ ಹಾಗೂ ಕೊನೆಯದಾಗಿ ನಮ್ಮೆಲ್ಲರ ತಂದೆ, ತಾಯಿ, ಬಂಧುಬಳಗ ಎಲ್ಲವೂ ಆದ ಶ್ರೀ ನಾರಸಿಂಹ ದೇವರ ಸ್ಮರಣೆ ಮಾಡಿಸಿ ಜ್ಞಾನ ಹಾಗೂ ಗಾನಭಂಡಾರವನ್ನೇ  ಶ್ರೀ ಪುತ್ತೂರು ನರಸಿಂಹ ನಾಯಕ ಮತ್ತು ವೃಂದದವರು ನಮ್ಮೊಂದಿಗೆ ಹಂಚಿದರು. ಸುಮಾರು ಮೂರುವರೆ ಘಂಟೆಗಳ ಕಾಲ ನಾದಾಮೃತವನ್ನು ಯಶಸ್ವಿಯಾಗಿ ಮುನ್ನಡೆಸಿ ಕೊಟ್ಟರು.

ಶ್ರೀಯುತ ಶಿವಣ್ಣ ಬರಗೂರು ಇವರು ಸಭಿಕರ ಒತ್ತಾಯದ ಮೇರೆಗೆ ಎರಡನೇ ಬಾರಿಗೆ ಆಗಮಿಸಿ ತಮ್ಮ ಕಂಠಸಿರಿಯಿಂದ ಗಾಂಧರ್ವ ಲೋಕಕ್ಕೆ ಕರೆದೊಯ್ದ ಶ್ರೀ ಪುತ್ತೂರು ನರಸಿಂಹ ನಾಯಕ ಮತ್ತು ವೃಂದದವರಿಗೆ, ಸಹಾಯ ಮಾಡಿದವರಿಗೆ, ಸಭಿಕರಿಗೆ ಮತ್ತು ಸ್ವಯಂಸೇವಕರಿಗೆ ವಂದನೆಗಳನ್ನು ಸಲ್ಲಿಸಿ ಕರ್ಯಕ್ರಮಕ್ಕೆ ಮುಕ್ತಾಯ ಹಾಡಿದರು.

ವರದಿ: ಶ್ರೀಮತಿ ಕವಿತಾ ರಾಮಕೃಷ್ಣ